Hoffenheim-in Bayern sawp

Champion theihna zawng zawnga champion Bayern Munich-in Pathianni zan khan Rhein-Neckar Arena an tlawh a, Hoffenheim lakah 4-1 in an mualpho.

Hoffenheim hian Ermin Bicakcic leh Munas Dabbur te hmangin hma an hruai a, Bayern-in Joshua Kimmich hmangin sut ṭhen mah se Mizoram rawn zin tawh Bundesliga club hian Andrej Kramaric hmangin goal hnih an khung belh.

Season liam ta khan Bayern hian Champions League, Bun-desliga leh DFB Pokal nomawi an chawi vek a, Hoffenheim an hmachhawn hma hian Sevilla 2-1 a hnehin Super Cup nomawi an chawi bawk.

Hansi Flick-a'n nomawi pali kawl chungin Hoffenheim a hmachhawn a, Robert Lewandowski leh Leon Goretzka te hahchawlhtir mah se chak tura rin an ni tho. 

Bayern hi chak se, khualmuala vawi 11 a zawna an chakna tur a ni a, Bundesliga record an siam dawn. Amaherawhchu goal hmaah Hoffenheim an hriam zawk a, Bavarians lakah chak an phu a, Hansi Flick-a hoten record an siam thei ta lo.

Bundesliga-ah Hoffenheim leh Augsburg te chiah vawi hnih khelha chak ve ve thei an awm a, Augsburg hi Inrinni zana Borussia Dortmund hnehtu an ni.