NE United hmelhmang thlak danglamtu Mandar Tamhane

NorthEast United-in Durand Cup 2024 nomawi an chawi a, India rama inelna ngaihhlut an chawi theihna kawngah hian player leh coaching staff bakah club CEO Mandar Tamhane ten hmun pawimawh an chang.

Nikum May 16 khan NE United hian Mandar Tamhane hi CEO atan an lalut a, ani hian Bengaluru-ah kum 10 chhung CEO hna a chelh tawh. Bengaluru FC-in professional zin kawng an zawhna kawngah Tamhane hi a tel a, NE United a zawm hnu lawkah coach Juan Pedro Benali a lalut a, ani hian Durand Cup a champion pui.

Spanish coach Benali thawhpui tur hian Tamhane hian Bengaluru-a coaching staff ṭhahnem tak a la chho a, NE United-ah kalphung thar hmun tur a awm nghal. Ṭum dangah chuan nipui bazarah player lut leh chhuak an ṭhahnem a, Tamhane awm hnuah erawh player pawimawhte chelh vekin an mamawh tur player an lalut. Chung zingah chuan Durand Cup champion-na kawnga pawimawh Guillermo Fernandez pawh a tel.

NE United hian Indira Gandhi Athletic Stadium chu home match khelh nan a hmang a, a bul lawkah training ground an nei a, natural grass ve ve a ni. Training-naah player-ten GPS vest an ha vek a, hei hian an tlan zat leh thil pawimawh dang a chhut thei a, team khat daih hi nuai riat man a ni.

Team analyst Amogh Adige chuan, "GPS vest hmang hian kan training-a player dinhmun kan hre thei a, player-te chet dan a zirin coach-in training session a siam dan thlengin a thlak leh ṭhin," tiin Vanglaini a hrilh.

Team training lai hi drone leh VO camera hmangin an la a; VO camera-ah hian lens pahnih awmin ball awmna lai apiang a la a, nuai hnih man vel a ni. Video hmang hian player positioning dik leh dik lo te an thlir let ṭhin a, an khelh dan hmang zir letna ṭha tak a ni.

NE United-in awmze neia training an kalpui avangin Durand Cup an champion pawh a tih theih a, final-ah Mohun Bagan hmachhawnin team nem zawka ngaih ni mah se penalty shootout hmangin an chak.

Team analyst Amogh Adige chuan, "Bagan aṭanga penalty pet ṭhinte penalty pet na lam kha zirchianna kan nei a, an petna lam chu inang vek lo. Vei lamah vawi engzat nge a pet a, lei hrulin nge a kangin a pet tih thlengin kan chhinchhiah a, kan sawi ho hnuah thutlukna kan siam. Player panga pet aṭang khan pakhat chiah kan tisual," tiin Vanglaini a hrilh.

Final boruak sangah Gurmeet chuan, Liston Colaco leh Subhasish Bose te penalty pet a dang a, penalty shootout-ah NE United 4-3 in an chak. Goalkeeper Gurmeet chuan, "Team anga kan inbuatsaihna tihlawhtling turin rilru fim a ngai a, kan game plan-ah kan chiang a ni," tiin Vanglaini a hrilh

Penalty pet goal tu captain Míchel Zabaco chuan, "Penalty chu a zamawm alawm. Vanduai ṭum a awm a, chutihrualin ka tihtur ṭha takin ka ti," tiin Vanglaini hnenah a sawi ve bawk. Spanish defender Zabaco hian tun season ISL-a champion turin theihtawp an chhuah tur thu a sawi bawk.

NE United hian ISL match hmasa berah September 16, Thawhṭanni zan khan Mohammedan 1-0 in an hneh a; September 23, Thawhṭanni zanah Durand Cup final-a an hneh Mohun Bagan an hmachhawn leh ang.