Indian mila khelh a ngai - Benali

NE United manager Juan Pedro Benali hi Spanish mi a ni a, India ram a rawn pan hma hian Spain, Morocco, Qatar, Tunisia, the UAE, Japan leh Finland-ah te hna a thawk tawh a, tawnhriat a nei ṭha hle.

Benali hi Spanish ni mah se a naute hi Spain football-in an larpui 'tiki taka' khelhpui lo a, NE United-in Durand Cup an champion ṭumah pawh ball vawrhchhuah a tam a, an khelh dan hmang hi tiki taka nen a inhlat hle.

Hemi chungchang zawhna chhangin Juan Pedro Benali, "Spanish rilru put hmang a dang a, an naupan lai aṭanga an enkawl seilen dan a danglam. Spanish player chu technique-ah an ṭha em em a, Indian nena khaikhin chi a ni lo. Chuvangin kei chuan NE United tana ṭha ber turin inkhel dan tur ka duang a, passing game ringawt loin Indian mila khelh a ngai," tiin Vanglaini a hrilh.

Benali hian CEO leh technical director hna a chelh tawh bakah academy a nei a, football-ah tawnhriat chi hrang hrang a ngah tawh. Madrid-a piang niin kum 1999 khan Atletico Madrid zawmin Claudio Ranieri hnuaiah technical assistant hna a chelh tawh.

NE United manager hian ṭawng chi riat a thiam a, vai ṭawng (hindi) pawh thiam tumin a inzir a, zirna lamah Master of Psychology a ni bawk. Benali chuan, "Psychology lama ka hriatna hian team enkawlah pawh min pui hle. Player-te hian rilru lama harsatna hi an tawk nasa a, kan enkawl thiam hi a pawimawh a ni," tiin Vanglaini a hrilh.