MFA hmalakna a chhuanawm - Moosa

Mizoram Football Association chuan kum bithliah inelnaah player-te kum dika an kal theih nan theihtawp chhuahin hma an la a, tun hnaiah Mizoramin kum bithliah inelnaah result a nei ṭha tawk lo.

Amaherawhchu, Mizoram hmalakna hian thlawptu a nei a, chung zinga mi chu NorthEast United assistant coach Naushad Moosa a ni. Maharashtra-a piang Moosa hi a inkhelh hun laiin defender niin East Bengal, Mahindra United leh Mohammedan bakah India tan thlengin a khel tawh a, NE United a zawm hma hian Bengaluru-ah assistant coach hna a thawk.

Kum 52 mi Moosa chuan, "MFA hmalakna hian minti lawm a, hun duh deuh mah se rah ṭha a thlen ngei ka ring. Player kum en nana digital birth certificate in phut avangin player-te kum dikin an khel dawn a, hei hi Mizoram chauh ni loin India ram football tan pawh chanchin lawmawm a ni thei ang," tiin Vanglaini a hrilh.

Mizo player-te chungchang sawiin Moosa chuan, "Mizote hian theihna sang tak in nei a, NE United senior team-ah pakhat chauh awm mah se reserve-ah chuan paruk vel an awm thung. Mizoramah football a ṭhang zel a, hemi kawngah hian media lam pawh inthawk ṭha ka ti. Football hlawhtlinna kawngah hian hna ṭha tak in thawk a ni," tiin a sawi.