Coventry lakah Spurs chak hram

Tottenham Hotspur chuan Coventry City hneh turin vanneihna an mamawh - hun tawp dawna Brennan Johnson-a goal hmangin Coventry City chu 2-1 in an hneh hram.

Nilaini zan League Cup third round inkhelah, mualneitu Coventry hian minute 63-naah Brandon Thomas-Asante hmangin goal an nei, hun rei tak chhung an hum theih avangin an tlang dawn ni pawhin a lang hman.

Spurs tan Championship club hneh loa tlak hi thil zahthlak tak tur a ni, hun tawp dawn lamah erawh team ṭha zawk an nihna a lang. Minute 88-naah Djed Spence chuan Dejan Kulusevski siamsak hmangin a sut a, minute 90+3-ah Johnson chuan chakna goal a khung zui bawk.

Tottenham manager Ange Postecoglou chuan, "Mutan lai kan la nei, chumi chu a rang thei ang bera siamṭhat pawh ka duh. Amaherawhchu, kan nihna ang tak nei let tur erawh chuan awlsam taka thlen mai theih a ni dawn lo niin a lang.

"Tun hma aṭangin ka sawi tawh ṭhin, thil ṭha chu awlsam leh nuamsa taka neih theih mai a ni ngai lo," tiin a sawi a, tun lai an khelh danah chuan a naute a duhkhawp lo deuh tih a hriat theih.

North London club hian hmanni lawk khan an hmelma Arsenal chu 1-0 in an ngam lo. Gunners laka an chak loh hnuin Coventry lakah tlawm zui ni ngat se la chuan fans lungawi lo thawm a ring khawp ang, a rang thei ang bera insiamṭhat chu an mamawh takzet.

Postecoglou chuan sawi zawmin, "Kan khelh danah duhthusam lo lai la tam mah se, hun tawp dawn lama kan beih dan erawh a lawmawm hle a, kan team hian beiseina leh theihna kan nei tih chu kan hmu," a ti.

Inkhel dangah Premier League club pahnih an intawng a, season hmang ṭha zawk Brighton & Hove Albion chuan an mikhual Wolves chu 3-2 in an hneh a, an phu ang ngeiin fourth round an inhlangkai.

Falmer Stadium-a inkhelah Brighton tan Carlos Noon Quomah Baleba, Simon Adingra leh Ferdi Kadioglu ten goal khat ṭheuh an khung a, mikhual goal pahnih hi Goncalo Guedes leh Tommy Doyle te khung a ni thung.

Gary O'Neil kaihhruai Wolves hian season bul an ṭan fuh lo hle - Premier League table mawngphah lamah an talbuai mek a, insiamṭhat tumin League Cup lamah theihtawp chhuah mah se an tlawm leh ta a ni.

Kar laihawla match hautak khel chungin tun kar tawp hian EPL khel turin Aston Villa an lenchilh dawn. Villa Park hnua an hmabak leh hnai ber chu Liverpool a ni - O'Neil tan a hna ngai chelh reng a harsa mai thei.