A tawpah PSG an vannei

Paris Saint Germain chuan tun season Champions League an match hmasa bera chak turin vanneihna an mamawh tel - Nilaini zan inkhelah an mikhual Girona chu 1-0 in an hneh hram.

Paris khawpuia khelmual hmingthang pakhat Parc des Princes-a inkhelah, mualneitu PSG hian inkhel an thunun hneh hle a, goal khung tuma shot pawh vawi 26 tehmeuh an nei.

Mahse, Luis Enrique naute an vannei tawk lo a, goal khung an harsat tlat - hun tawp dawn ṭepah Girona goalkeeper Paulo Gazzaniga chuan anmahni lamah a tilut palh a, he goal hi PSG chak nan a tawk!

Paulo Gazzaniga hi a khel ṭha hle a, an khingpui goal khung tur pawh a dansak hnem. Mahse, hun tawp dawnah mual sir aṭanga Nuno Mendes-a cross chu harsa vak loa lo mansak theih tur niin lang mah se a man ṭhelh, a kapkarah lutin anmahni goal-ah a luh phah.

Paris Saint Germain coach Enrique chuan, "Girona khan ball an hloh duh lo tluk a ni a, anmahni an inveng thiamin an ball chan kha a him ṭha em em a ni, khatiang team hmachhawn kha chu a harsa thei hle.

"First half bikah khan goal khung theihna remchang kan insiam nual a, mahse kan chhawr ṭangkai thei lo. A tawpah erawh beidawng duh miah loa kan beihna rah chu kan chhawr ṭangkai niah ka ngai.

"Season kan ṭan dan ka thlirlet a, lawmna tur zel a ni. Inelna hrang hranga match panga kan khelh tawh chinah kan chak vek, tunah chuan Champions League kan khelh leh hmain Ligue 1 match pahnih kan khelh a ngai dawn, chumi atan chuan kan inbuatsaih nghal ang," a ti.

Paris club hian Ligue 1 nomawi chu an chawi leh mai pawh a rinawm, chutihrualin club neitu lamin an duh ber Champions League title lak erawh thil awlsam a ni dawn lo a, an bul ṭan dan thlir phei chuan hmasawn an mamawh tih a chiang.

Lionel Messi, Neymar leh Kylian Mbappe te an neih laiin UCL an champion thei lo, anni pathum awm tawh loh hnuah team an indinthar leh mek a, coach ṭha Enrique-a'n engtiang chena thui nge a kalpui theih kan hre dawn a ni.