November 1-ah Zudio Pro Fight

Zudio LPS Pro Fight 2024 tan hun tura ruahman tawh chu sawn tlai hretin, November 1, Zirtawpni zanah LPS Arena, Falkland-ah inhnek ṭanin December kar hmasa ber thleng a awh ang.

Ruahman dan chuan October 28, Thawhṭanni zana ṭan tura puanzar tawh a nih laiin, LPS Arena hman chungchang leh remchan zawkna avangin ni liin sawn hlat a ni a, Mizoram chhung leh pawn aṭangin kum 17 aṭanga kum 40 inkar a duh apiang, mahni sensoin an tel thei a ni.

September 23, Thawhtanni aṭangin LPS Office, Zarkawtah tel tur tan entry form pakhat Rs 10 zelin a lak theih dawn a. Nikumah boxer 281 telin kuminah eng zat nge inlan dawn hriat la ni lo mah se, organising committee chuan kum kal ta aia tam an nih an beisei a, chutih rualin December kar hmasa ber thleng championship awh turin ruahmanna a siam lawk a ni.

Pro Fight vawi 11-na neih a ni dawn tih puanzar a nih hnuah Mizoram chhung mai ni loin India ram state dang aṭangin ngaihven an awm a. Kum dangah ṭhenawm state aṭanga tel an awm fo tawh a, tun tumah hian Andaman and Nicobar Island aṭangin boxer eng emaw zatin tel an tum tih an sawi a, tihchian erawh a la ni lo thung.

Weight hrang panga fly (kg 48-52), bantam (kg 52-56), light (kg 56-61), welter (kg 61-67) leh middle (kg 67-74)-ah title an inchuh dawn a, mimal chawimawina tel lovin lawmman pawisa fai Rs 6,50,000 sem chhuah a ni ang.