Gauff leh a coach Gilbert inṭhen

Hmeichhe tennis world number 6 Coco Gauff chu a coach Brad Gilbert nen an inṭhen, an thawhdunna an tihtawp chhan hi tun hnaia result ṭha a neih hleihtheih loh vang nia sawi a ni.

American nula Gauff hian season a hmang ṭha tawk lo, a bik takin US Open nomawi a kawl lai a hum thei lo. New York khawpuiah result a nei ṭha lo a, hei hian na takin a nghawng tih a chiang.

Andre Agassi, Andy Murray leh Andy Roddick pawh lo enkawl tawhtu Brad Gilbert chuan, "Coco, kum 20 mi chauh i la ni a, hmabak eng leh thui tak i la nei, hlawhtlinna sang tak chang zel turin ka duhsak che," a ti.

Season hmasa khan Gauff hian Aryna Sabalenka hnehin US Open nomawi a chawi a, tournament dangah pawh a khel ṭhain khawvela a ṭha berte zinga miah a inhlangkai hman hial.

Mahse, kumin atan chuan January thla khan Auckland title a la a, inelna dangah a la hlawtling leh rih lo. Tunah chuan boruak thar tem tumin coaching team a siksawi dawn ta tihna a ni.