Team 'thar' Dortmund an chak

Season hmasa Champions League finalist, coach thar leh player thar nena indinthar hna thawk mek Borussia Dortmund chu Champions League-a an match hmasa berah an tal hiar nghal hle - an mikhualna ramah Club Brugge chu 3-0 in an sawp a, English rawlthar duhawm Jamie Gittens chuan goal hnih a khung.

German club tan hian Gittens bakah hian Serhou Guirassy (penalty) chuan goal khat a khung bawk a, Belgian club-in a chhanletna tur an neih loh avangin mahni mualah 3-0 ngawtin an tlawm.

Hetihrual hian Nuri Sahin-a enkawl Dortmund hi awlsam erawhin an chak bik lo. Club Brugge-in an vanduaina an thlir chuan sawi tur an nei. Hugo Vetlesen chuan hnai set sawt aṭangin crossbar a tihper a, Raphael Onyedika leh Vetlesen te hun ṭha neih dang chu Dortmund goalkeeper Gregor Kobel chuan ṭha zetin a dansak a, Hans Vanaken-a'n hming chher theihna remchang a neih a chhawr bik lo.

Greece international Christos Tzolis pawhin a chance neih a hlah kha a thlirlet ang a, a ui vawng vawng ang - a tawpah Dortmund an vannei a, minute 76-naa goal khung ṭanin, hun a tawp meuh chuan goal thum an khung der.

Kum 20 mi Gittens-a'n goal hnih a khung hnu, hun pek belhah Brandon Mechele chuan Serhou Guirassy lakah penalty a chawi a, Dortmund striker thar Guirassy chuan goal-ah a chantir. Hun a tawp zui a, Dortmund an chak.

Dortmund hian coach thar Sahin-a hnuaiah match nga an khel tling ta a, tlawm an nei miah lo - league match thum an khelh tawhah vawi hnih chakin, vawi khat draw an nei a, DFB-Pokal leh Champions League-ah match khat ve ve khel tawhin, an chak ve ve bawk.