Celtic-in goal nga an khung

Scottish champion Celtic chuan Champions League-a an match hmasa bera an chak vawi khatna ni turin Slovan Bratislava an hneh a, an hneh a ni satliah lo - goal nga ngawt an khung!

Celtic Park-a inkhelah mualneitu team tan Liam Scales, Kyogo Furuhashi, Arne Engels (penalty), Daizen Maeda leh Adam Idah ten goal khat ṭheuh an khung a, Slovakian club tana Kevin Wimmer-a goal khung chu mualpho zualpui khuhna chauh a ni.

Tottenham Hotspur centre back hlui Wimmer-a'n goal-a khung hi minute 60-na a ni tawh a, hetihlai hian Slovan Bratislava hian goal thum an chhuah fel tawh avangin, an tan 'comeback' a harsa tawh.

Celtic hian Champions League hi season 13 ngawt an lo khel ve tawh a, an match hmasa bera chak an nei ngai lo. Tunah erawh kalphung thar hnuaia an match hmasa berah team nem zawk an chang a, hnehna an chang ve ta.

Hei mai a ni lo - September 1977-a Jeunesse Esch (6-1) laka an chak hnua Celtic-in Champions League emaw European Cup-a match khata goal nga an khung tlin leh hmasak ber a ni a, coach Brendan Rodgers-a tan pawh zan chhinchhiahtlak a ni.

Liverpool boss hlui hian Champions League-a a match hmasa 23-ah a naute vawi hnih chiah a la chakpui a, a match hnuhnung pahnihah a chak thung. Reds kha match ruk kaihruaiin, vawi khat chiah a chakpui a, vawi hnih draw neiin, vawi thum a tlawmpui.

Celtic hi vawi 19 a kaihruai a, vawi thum a chakpui a, vawi li draw neiin, vawi 12 a chak lohpui - European football inelna sang bera a record hi chhuan tur a awm rih lo.