Punjab khelmualah Odisha an leng dawn

Indian Super League pawh zan khat an chawlh hnuah, nizan aṭang khan khelh a ni leh ta a, Bengaluru leh Mizo tamna Hyderabad FC inhmachhawnin, an result kan hre hman lo - zaninah ISL match khat a awm dawn a, Punjab FC khelmualah Odisha an lenglut ang.

Season hmasaa I League champion nih vanga ISL inpetkai Punjab hian season bul an ṭan ṭha viau a, coach thar Panagiotis Dilmperis hoin an match hmasa berah Kerala Blasters chu khualmualah 2-1 in an hneh thei.

Mahse, Punjab hian Mizoram player kawl an nei lo a, Odisha hian player panga ngawt an nei thung - Spanish coach ṭha Sergio Lobera enkawl Odisha tan hian Isak Vanlalruatfela leh K. Lalṭhathanga te chu player pawimawh an ni a, zaninah pawh bul an ṭan leh ngei a beiseiawm.

Odisha hian player tawnhriat nei ṭha Jerry Mawihmingthanga leh Jerry Lalrinzuala an kawl bawk a, season hmasa lama Hyderabad FC tana khel defender Jeremy Zohminghlua chu an la lut thar bawk.

Mahse, Odisha hian beisei angin season bul an ṭan lo a, an match hmasa berah mikhual Chennaiyin chu 3-2 in an ngam lo. Lobera leh a naute tan mualphona a ni a, zaninah insiamṭhat an tum ang.