Leicester City leh Jamie Vardy te an vul A chetsualna ngaiah Pep a tawlhthlu

Manchester City midfielder Rodri chuan Leicester City an vannei a ti a, amaherawhchu Pathianni zana an inkhelhna hmun hi Eithad Stadium a ni a, Foxes hi 5-2 zetin an chak. Brendan Rodgers-a hoten match thum khelhah point kua an hmuh bakah goal difference a ṭhat avangin Premier League hmahruaitu an ni. 

Leicester City tan Jamie Vardy-a'n hattrick a siam a, James Mad-dison leh Youri Tielemans ten goal khat ve ve khung bawkin goal nga zet an khung. Pep Guardiola hoten Riyad Mahrez hmangin goal khung hmasa mah se tihsual an nei tih tih an pawm a ṭul a, minute 84-naa Nathan Ake goal khungin an mualphona a hliah khuh zo lo.

Minute lina lekah Mahrez-a'n Man City goal hmahruai a khung a, corner aṭanga ball chhuak chu Algerian winger hian kawh zetin a hlap goal. Leicester City keeper Kasper Schmeichel tan dan theih a ni loa, player ṭha bikin a club hlui lamah goal mawi a khung.

Man City defender Kyle Walker-a'n box chhungah Vardy a titlu a, English striker hian penalty hi pet nghalin minute 37-naah kawh zetin goal laiah a pet lut. First half-ah 1-1 a ni a, chak zawk tur hriatthiam a la har hle.

Minute 53-naah Atalanta aṭanga Foxes zawmtu Timothy Castagne cross chu Vardy-a'n a kheng goal a, English striker finishing a tawih a, Foxes player Castagne-a'n hming a chher chho zel bawk.

Man City defender-te an insiamṭha lo, City defender Eric Garcia-a'n Harvey Barnes through ball um luttu Vardy a ti tlu a, penalty a chawi. English striker hian goal kilah tak a pet a, Ederson ring dik mah se dan theih a ni lo.

Minute 77-naah subsitute James Maddison-a'n box pawn aṭangin mawi zetin a pet kum lut a, Foxes-in 4-1 in hma an hruai der. City defender thar Nathan Ake-a'n corner aṭangin a tauh lut a, minute 84-na a nih avangi Pep Guardiola hoten beiseina tlem an neih phah.

Amaherawhchu Benjamin Mendy-a'n box chhungah Mad-dison a ti tlu a, English midfielder a tluk thiam bawk avangin referee tan penalty pek ngei a ṭul. Jamie Vardy a chhuah tawh avangin Tielemans a rawn pen chhuak a, minute 88-naah keeper Ederson bumin Foxes goal ngana leh a tawpna ber a khung.

Manchester City-in hliam vangin Sergio Aguero leh Gabriel Jesus te an chan a, midfielder pahnih Bernardo Silva leh Ilkay Gundogan te chu hliam leh Covid-19 positive vangin an chhawr thei lo. 

Foxes an hmachhawn hmain Guardiola-a'n senior player fit ṭha 13 chauh a kawl thu a sawi a, chhuanlam ṭha tak an nei sa. Leicester City nen hian Aymeric Laporte chu bench-ah awm tawh mah se coronavirus positive vanga training a zawm tlai avangin inkhel thei a la ni lo.

Chutihrualin City tana bul ṭantu zingah Eric Garcia chiah tlema patuai deuh a awm a, Barca leh City academy chhuak Spanish defender hian season liam ta khan league-ah vawi 13 a inlan avangin chhuanlam siamna tur erawh a ni lo.

Man City-in chakpui tham first eleven an nei a, bench-ah erawh Laporte leh Ferran Torres te chiah senior team player an awm. Substitute dang erawh academy player-te an ni a, League Cup-a goal khungtu 'throw in' nat vanga lar Rory Delap-a fapa Liam Delap pawh a tel.

Player inhliam dan thlirin Pep Guardiola-a'n chhuanlam ṭha tak a neiah a ngaih theih a, amah-erawhchu tun hnaia an sum hman dan thlir erawh chuan chhuanlam a tling lo. Man City hian transfer bazarah an mit it zawng an hlah meuh lo a, player inhliam vangin buai bawk mah se an khel ṭha tawk loah a ngaih theih.

Man City-in hmawr bawk dan turah remhriatna an tlachham a, 72% zet ball chang mah se Leicester tlarhnung tan harsatna an siam thei meuh lo. Foxes manager Brendan Rodgers erawhin City chhutlet dan tur a duang ṭha a, hei hi Pep Guardiola hote chak lohna chhanah a ngaih theih zawk.

Pep Guardiola-a'n thutlukna a siam sual a, 1-1 a nih laiin kum 35 mi Fernandinho aiah a kum chanvea naupang kum 17 mi Delap a luhtir a, pressure a san tawh bawk avangin inkhel result a thlak phahah ngaih theih. Brazilian midfielder tel loin Man City tlarhnung pawp sawt a, feet ruk leh inch khata sang Delap-a awm hnuah Man City-in ball an vawrh nasa a, goal hmaah erawh an hlauhawm phah lo.

Man City manager Pep Guar-diola chuan, "Kan khelh ṭhat reng pawh a ni lo zawngin ka nauten an thlir a, kan hlauthawng a, kan zam ṭhin a ni. Halftime-ah dawhthei turin ka hrilh a, a taka lanchhuahtir an harsat," tiin an rilru put hmang thlak a ṭul thu a sawi.

City midfielder Rodri chuan, "Football hian dik takin ro a rel ṭhin lo. Chak tumin theihtawp kan chhuah a, team ṭha tak Leicester-in player 11 nena goal venhim an hnial lo. Kan khingpuiten goal venhim tawp an tum chuan a buaithlak ta ṭhin a ni," tiin a sawi a, Foxes chu an tih ṭhat vang ni loin an vanneih vanga chak an nih thu a sawi tel bawk.

Man City-in point an hloh satliah lo a, season hmasa ang thoin hun pawimawhah an chesual. Pep Guardiola hote hi an insiamṭhat ran loh chuan Jurgen Klopp-a kaihhruai Liverpool el pha tur an awm ang em tih hi zawhna a ni a. 

Chutihrualin nizanah Reds hian Community Shield-a an hneh loh Arsenal an hmachhawn a, inkhel result-in Premier League ngainatute ngaihdan a siam thiam tir ang.

Leicester City-in match hmasa pathum aṭangin goal 12 an khung der tawh a, 2012-13 season-a Manchester City (12) leh Manchester United (13) te hnua match hmasa pathuma goal khung tam ber an ni. 

Brendan Rodgers chuan, "Ka hnuaia Leicester City khelh ṭhat ber ṭum a ni. Goal kan chhuah hma chungin kan talbuai lo a, ka naute kan game plan-ah an chiang hle," tiin an khelh danah a lungawi hle.

Hattrick siamtu Vardy-a'n Pep Guardiola awm hnuah Manchester City lakah goal riat a khung tawh a, ṭum hnih hattrick a siam tawh. English striker hi kum 33 mi a ni tawh mah se Premier League hmatawng ṭha ber zinga mi a ni.