Zu ngawlvei Cicinho a piangthar

Real Madrid right back hlui Cicinho chuan zu vanga hun harsa tak a hmachhawn thu a sawi chhuak a, Brazil international hlui hian Isua a chhar hnuah zu bawih aṭanga a chhuah thu a sawi bawk.

Kum 36-a upa Cicinho chuan, "Kei hi zu hnih khat in zawha duh tawk ve mai chi ka ni lo a, ka chah thlak ṭhak thlenga in ṭhin ka ni. Ka nun dan ka sim thuai loh chuan ka hmabak chu thih a nih thu min hrilh. Ṭum khat chu 18 caipirinhas (Brazil national cocktail) leh beer bottle 14 ka inzawh hnuah Isua ka tawng a, ka thlah theih phah ta a ni" tiin tlang takin a hun tawn chungchang a sawi.

Brazilian full back hi season liam ta kha chuan Turkish club Sivasspor-ah a la khel a, 2006-07 season-a Real Madrid-in La Liga an champion ṭum khan a tel. Spanish club a zawm hma hian Sao Paulo tan khelin 2005 khan nomawi pathum Campeonato Paulista, Copa Libertadores leh FIFA Club World Cup te a chawi a, Real-ah kum hnih a awm hnuin Roma zawmin Coppa Italia (2008) leh Supercoppa Italiana (2007) ah te a champion bawk.

Cicinho hian Brazil tan vawi 15 inlanin 2005 FIFA Confederations Cup champion team-ah khan a tel nghe nghe. Real Madrid right back hlui Cicinho chuan, "Tunlaiah chuan lumeh dan te, social media-a inphochhuah te kan ngai pawimawh em em a, player ṭhenkhat phei chuan Copa America-a khelh loh te an dil hial. Hetiang tur hi a ni lo, Brazilian team hian rilru puthmang dik an mamawh a ni," tiin an ram football tlahniam mek chungchanga a ngaihdan a sawi chhuak.