Chhinga Veng thawm a lian zel
Mizoram Premier League Season 5 khel turin Chhinga Veng an tling hnuhnung ber a, amaherawhchu MPL kai thar hian a tikimtu nih ringawt an tum lo.
Inelna ṭan hma chuan Aizawl FC leh Chanmari FC te huanga dah nghal ngawt chu a fuh tawk lo thei a, chutih rualin an player neih dan leh an club kalphung thlir chuan MFA Cup leh Aizawl DFA First Division champion hian tluk loh an nei bik kher lo ang.
Kalhmang hria
Chhinga Veng FC-in an club chanchin Facebook leh Instagram-ah mumal takin an tar chhuak reng a, supporter-te'n an club chanchin hre turin zawn buai a ngai lo.
March thlaa Khawtetlang field, Serchhip-a MFA Cup an champion khan Chhinga Veng FC ṭawiawm turin Aizawl aṭangin mi ṭhahnem tak an kal cho a, hei vang hian I Day Football, MFA Super Cup leh MPL-ahte ṭantu ngaha an sawi Bethlehem Vengthlang FC leh Chanmari FC te an elphak nghal beisei a ni .
The Chhingcows!
Dinthar FC ṭantute chuan awm-ze thuk tak neiin 'The Mai-mawms' hming lem an invuah a, Chanmari FC lam chuan an veng hming aṭanga thur chhuakin 'Chanmarians' an inti bawk. Chhinga Veng FC ṭantute hi 'The Chhingcows' tih an ni.
Chhingcows tih hi 'fiamthu' lam hawi a ni lo a, tun hma aṭanga Chhinga Veng mi leh sa sawina niin Chhinga Veng
ṭhalaite chu huaisen leh ṭangrual tia sawi an ni a, an tlawm duh lohna leh an ṭanrualna avangin Chhingcows hi an hunlai chuan ngaihsan an ni.
Chhinga Veng hminglem hi 'Chhingcows' a ni a, football-ah chauh ni lo - cricket, basketball leh infiamna dangah pawh Chhinga Veng ṭantute chu Chhingcows an inti. Club logo-ah satel awm mah se tun hmaa an lo larpui tawh Chhingcow chu nickname atan an thlang.
CVFC committee chuan 'rual u-te anga tlawm duh lohna leh tumruhna' nei turin player-te an fuih fo a, hnehna chan tuma a tawp thlenga bei turin an player-te hi an beisei bawk.
Champion tum
Chhinga Veng FC hian an club indinthar hnua First Divi-sion an khelh lehna hmasa berah an champion a, season liam ta khan a ṭum khatna atan Aizawl DFA inelna hi league-in khelh a ni a, hei hian CVFC champion ropuina a belhchah.
Tun hmain MPL Playoff-ah MPL pasarihna hneh thei an la awm ngai lo a, Chhinga Veng hian Luangmual FC hnehin MPL khel turin a inpet tling a, record thar an siam bawk.
CVFC hian MFA Cup an vawi khat khelhnaah champion-in season liam ta kha an khar a, season tharah eng nge an thlen dawn tih hi zawhna chu a ni.
Tun hmain I Day Football, MFA Super Cup leh MFA Cup an la khel ngai lo a, Mizoram club ṭha dangte nen huang khata an awm tawh avangin nomawi chawi nghal a harsa ang.
Hetihlai hian Chhinga Veng hian champion ngei tumin MPL-a striker ṭha ber zinga mi MS Dawngliana (Dawngtea) an lalut a, hemi hnu hian Aizawl FC aṭangin H. Lalmuankima leh Ronald Zothanzama, Chanmari FC aṭangin Joseph Lalnunpuia leh Lalrozama Fanai-te lalutin transfer bazarah club lian dang nen an inel tawk.
Dinthar FC coach Lalrem-tluanga chu head coach atan an lalut a, AFC B-Licence nei coach hian a club hlui aṭangin ṭhatpui tham player a hruai tel bawk.Rangdajied United leh Shillong Lajong midfielder hlui Joy Mrong Kharasswai an ziak lut tawh a, state pawn player dang an melh mek niin sawi a awm bawk.
Eng nge an sawi?
Chhinga Veng FC manager H. Lalremruata chuan, "Kan dam kim chuan champion thei squad kan nei chuan ka hria. Tunah erawh inhliam neuh neuh kan nei a, kan dam kim vat a ṭul a ni," tiin an team chanchin a sawi.
Season liam taa CVFC en-kawl-tu coach Remruata chuan, "Chhinga Veng hi veng lian a ni a, kan ṭan-rual bawk avangin ṭantu nei
ṭha ber pawl kan nih ka ring. Kei ni chuan Chhingcows hi kan chhuang a, Chhinga Veng FC a ni emaw infiamna dang pawh ni se anni hi Chhinga Veng tan chuan an hlu a ni," tiin Vanglaini palai a hrilh.
CHHINGA VENG FC SQUAD
# Hming Koh dan Permanent Adress
GOALKEEPER
1 Vanlalawmpuia Awpa Ralte N.Mualcheng
2 R. Lalhmangaihzuala Lalhmaa Lengpui
3 Vannunmawia Nunmawia Venghlui
DEFENDER
4 Joseph Lalramchhuana Sailo Joseph Sailo Zokhawthar
5 Ronald Zothanzama Zothana Bawngkawn
6 K. Lalthlahlova K. Patea Champhai Zotlang
7 Lalramfelpuia Felpuia Thingsulthliah
8 Lalrozama Fanai Rozama Bawngkawn
9 R. Laldinliana Dinliana Armed Veng South
MIDFIELDER/WINGER
10 H. Zonunthara Thara Champhai Zotlang
11 Joy Mrona Khar Raswai Joy Golf Link, Shillong
12 Vanlallawma VL Lawma Khawzawl
13 Lalramliana Varte Ramtea Sihphir
14 Zonunsanga Hmar Zonuna H Champhai Vengsang
15 Vanlalhriata Mahriata Vaivakawn
16 Lalsawmzela Somjela Champhai Kanan
17 H. Lalmuankima MKA Bawngkawn
18 Vanlalthanga VL Thanga Hualngohmun
19 Paul Ramfangzauva Paul Kolasib Vengthar
20 Francis Zonuntluanga Francis Durtlang Leitan
21 Lalchhanchhuaha Chhantea Champhai Zotlang
22 Lalthlamuana Thlatea Mamit
23 Isaac Lalremruata Isaac Chhinga Veng
FORWARD
24 Lalkhawpuimawia Mapuia Kelkang
25 MS Dawngliana Dawngtea Bawngkawn
26 Joseph Lalnunpuia Joseph Salem Veng
27 PC Vanlalhmangaihzuala PC-A Khawzawl Vengthar
Chhinga Veng - I Day Football Fixtures
July 26, Thawhlehni
12:30 PM Chhinga Veng FC Vs Chanmari West FC
July 30, Inrinni
02:30 PM Chanmari FC Vs Chhinga Veng FC
August 4, Ningani
12:30 PM Aizawl FC FC Vs Chhinga Veng FC
August 6, Inrinni
02:30 PM Chhinga Veng FC Vs AIFF Under 19