Arsenal tana duhthusam Xhaka - Mertesacker

Premier League pa-hnihna Arsenal defender Per Mertesacker chuan an player lakluh thar Granit Xhaka chu Gunners tana player duhthusam nia a hriat thu a sawi chhuak.

May thla khan Arsene Wenger-a'n midfield ti chak turin German Bun-desliga club Borussia Mon--chengladbach aṭang-in Xhaka hi a la lut a, Santi Cazorla, Jack Wilshere, Aaron Ramsey leh Fran-cis Coquelin te nen khelh-na hmun an inchuh ang.

Kum 23-a upa chauh la ni mah se Xhaka hi Switzerland captain a ni thei a, Euro 2016-ah khan an ram hi last 16 thlen pui mah se penalty a chhuih luh loh vangin an tla thung.

Season thara Arsenal captain tura ngaih Mer-tesacker chuan Emirates Stadium-ah Xhaka a pawimawh tur thu sawi-in, "Hruaitu a ni a, Bundesliga-ah ball pass a thiam zia a lantir tawh bawk. Player dangte fuih phura ho khawm thiam a nih vangin kan club tan duhthusam a ni. German ṭawng a hman thiam bawk avangin a season khatna aṭangin a mikhual lo ang," tiin Germany international hlui chuan Mesut Ozil te nen harsatna nei loa an inbiak theih tur thu a sawi