Federer leh Nadal inhnukdawk

Roger Federer leh Rafael Nadal te chuan Wimbledon champion Andy Murray hnungzuiin karleh chhunga khelh tur Toronto Masters-ah an inlan dawn lo thu Thawh-lehni khan an sawi chhuak.

Champion lai Andy Murray chuan Thawhṭanni khan a title humhim tura a inlan loh tur thu a lo sawi tawh bawk. Kumin Rogers Cup-ah hian Tennis palian pali zinga pathum an inlan dawn lo chiang tawh a, world number 1 Novak Djokovic erawhin thuthar a la nei lo thung. Serbian thiampuipa hi a inlan a nih chuan seeded pakhatna a ni ang.

Grand Slam vawi 17 champion tawh Federer hi Wimbledon semifinal-a Milos Raonic a hneh loh hnuah a la inkhel leh lo a, Nadal pawh ban rek na vanga French Open aṭanga a inhnuhdawh hnuah court-ah a hmel kan la hmu leh lo.

Swiss thiampuipa Federer chuan, "Toronto hi ka ngaina a, Canada mipui hmaa ka inkhel thei lo tur hian min ti lungngai. Mahse, ka hmalam hun ka ngaihtuah a ngaih avangin chawlh ka mamawh a ni. Nakkumah ka lo kir theih ka beisei," tiin vawi hnih a lo champion tawhna hmuna a inkhelh theih loh tur chungchang a sawi.

Rogers Cup champion vawi thum lo ni tawh Nadal pawhin a inlan loh tur chhan sawiin, "Ka ban rek na vangin ka chawl vang vang a, kar hmasa aṭang khan ka practice leh ṭan chauh avangin he inelnaah hian ka la inlan thei dawn lo, ka ngaih pawimawh loh vang a ni lo a, ka taksa dinhmun vang zawk a ni," tiin a sawi ve bawk.