Russia dinhmun la chiang lo

International Olympic Committee (IOC) chuan Rio Olympic-ah Russia an inlan theih dawn leh dawn loh a la sawi chiang thei lo chhunzawm zel.

Thawhṭanni khan World Anti-Doping Agency (WADA) hnuaia din Canadian law professor leh sports lawyer ni bawk Dr Richard McLaren-a kaihhruai chuan an thil hmuh chhuah an puang a - Russia chuan an infiammite chu damdawi hman phal loh a hman ruk tir bakah a hmangte pawh a thup sak niin a sawi. He thu avang hian WADA chuan Russia hi Olympic-a tel ve lo turin IOC chu a ngen.

Thawhlehni khan IOC chuan chawpchilh takin Switzerland-ah Executive Board meeting an nei nghal a, thutlukna fel tak an la siam thei lo! IOC hian ruahmanna an siam a, infiamna lama thubuai ngaihtuahtu sang ber Court of Arbitration for Sport (CAS) thu an ngaihchan bakah 2014 Winter Olympic-a Russian infiammi inlan zawng zawngte endik nawn leh turin ruahmanna an siam.

IOC president Thomas Bach chuan, "Rio Olympic-a Russia in lan theih dawn leh dawn loh chungchang hi ngaihtuah ngun a ngai a, zirchhiana aṭanga an thil hmuhchhuah hi ngun takin kan thlir let phawt a ngai," a ti.

Kumin June thla khan Inter-national Association of Athletics Federations (IAAF) chuan Rio Olympic atan hian All-Russia Athletic Federation (ARAF) chu 'track and field' bikah an anthlete-te tel an remtih loh thu an lo sawi tawh. Hemi chungchangah hian ARFA chuan CAS hnenah an thubuai hi an khinglet a, he an thuthlukna hian Russia hmalam chu thu takin a hril dawn a ni.