Handball dan leh VAR-in sawisel a hlawh

Tottenham Hotspur-in Newcastle lakah inkhel an thunun a, minute 25-naa Lucas Moura goal hmangin hun rei tak hma an hruai bawk. Amaherawhchu injury time-ah ball-in Eric Dier kut a per a, VAR hmanga ennawn a nih hnuah Newcastle penalty pek niin Callum Wilson-a'n siphurh sut nan a hmang.

Spurs boss Jose Mourinho-a'n khelmual a chhuahsan nghal a, sawi kher lo pawh ni se a thinrim tih a chiang nghal. Portuguese manager lungawi lohna hi Newcastle manager Steve Bruce ngei pawhin a ṭawmpui a, football expert tam takin VAR an sawisel bawk.

Tottenham Hotspur Stadium-a inkhelah hian Newcastle backup goalkeeper Karl Darlow-a'n vawi 11 zet save a nei a, point an hmuh theihna tura beiseina siamtu a ni. Amaherawhchu inkhel ti danglamtu tak erawh VAR a ni a, Andy Carroll ball tauhin hnung lam aṭangin Dier-a kut a fuh.

Inkhelh banah Mourinho chuan, "Tottenham hian an phu ang tawk zahna an dawng lo. England-a club pathum ka enkawlna a ni a, he club ka enkawl thei hi ka inchhuang a, ka hnaah hian ka hlim hle. Amaherawhchu tun ai nasa hi Spurs chungah hian zahna an lantir a ṭul," tiin club lian an nih loh vanga penalty chawiah a inngai.

Premier League-ah round thum pawh la khelh zawh hmain handball vanga penalty vawi ruk a awm tawh a, season liam ta khan vawi 19 a awm. Chutihrualin season liam ta khan tun ang hunah hian handball vanga penalty pek a la awm lo.

Newcastle manager Steve Bruce chuan, "Kum 100 chhung chu handball dan hi hman a ni tawh a. Tum reng vang a nih chuan penalty tur a ni a, chu pawh chu a chiang tur a ni. Hetiang a nih chuan football thil tum a ṭhelh a, a hmuhnawmna a bo a ni," tiin penalty vangin point hmu mah se a sawisel tho.

Inrinni inkhelah pawh Crystal Palace chu penalty dan thar vangin Everton lakah 2-1 in an tlawm. Palace manager Roy Hodgson chuan, "Handball dan hian awmzia a nei lo, football game hlutna a paih bo," tiin na takin a sawisel tawh.

VAR leh penatly dan hmang bawk hian Manchester United-in Brighton & Hove Albion 3-2 in an hneh hram a, dan thar hi faktu aiin sawiseltu an tam zawk. Chutihrualin Serie A leh La Liga-ah chuan season liam ta khan handball dan thar hi an hmang tawh a, Spanish league-ah handball vangin penalty 50 awmin Italian league-ah vawi 60 a awm a ni.