Striker talbuai Mario Balotelli

Italy coach thar Giam-piero Ventura chuan tun hnaia Liverpool coach Jur-gen Klopp-a'n club dang zawng tura a hrilh striker Mario Balotelli chuan a career-a hun thim lai ber a tawn mek thu a sawi.

Italy tan vawi 33 in-lana goal 13 khungtu Balotelli hian loan-a a khelhna Milan-ah vawi 23 inlana goal thum chiah a khungsak avangin Euro 2016 khelh zawh takah khan Antonio Conte-a'n a ko lo.

Ventura chuan, "Balo-telli hian a nungchang a siamṭhat a ngai a ni. Milan-ah khelhna hmun a chang tam lo a, Liverpool-in an duh tawh bawk si loh avangin a career-a hun thim ber a tawng mek a ni," tiin Italian striker talent nei ṭha chungchang a sawi.

Italy manager thar chuan sawi chhunzawmin, "Balotelli hian a chang chuan footballer tak tak nih a duh lo em ni aw ka ti ṭhin. A thiamna leh theihnaah ka chiang a, a engamah hmaa thutlukna siam ka tum lo. Mahse, a thiamna chu football hmangin a lantir tur a ni," tiin Balotelli tan kawng a khar lo.

Chelsea manager thar Antonio Conte thlaktu Ventura chuan league langsar lo lama kal Italian player-te chungchang sawi nghalin, "Player chuan chak duhna thin-lung an pu tur a ni a, league hniam zawka kal player-te chuan chutiang thinlung chu an puin ka hre lo. Shandong Luneng zawmtu Graziano Pelle hian engvanga China pan nge a nih ka hre lo a, kan hre thuai ang chu," tiin sum tamna league-a kal player-te a dah san hmel loh hle.