Andy Murray a tla nghal

French Open khelh ṭan niah Andy Murray chu Stan Wawrinka hneh loin a tla nghal. World number 1 hlui Murray hi duhsak takin wildcard pek ni mah se a vanglai pawha a ropui viau lohna clay court-ah beisei a phak lo.

Pathianni zan Philippe-Chatrier-a inkhelah darkar khat leh minute 37 chhungin Wawrinka-a'n 6-1, 6-3, 6-2, in hnehna a chang. Seeded 19-na Stan hian second round-ah chuan Dominik Koepfer a hmachhawn leh dawn a ni.

Grand Slam vawi thum champion tawh Murray chuan, "Ṭha takin khel pawh ni ila ka hmaa ding kha player ṭha tak a ni a, a awlsam dawn lo hrim hrim tih ka chiang. Theihtawp ka chhuah kha hnehna chan nan a tawk zo lo.

"Chak lo mah ila ka tawp mai dawn lo, theihtawpin tennis ka khel chhunzawm zel ang," a ti. Britain tlangval hi hliam vangin season thum vel a inkhel mumal thei tawh lo, a hliam dam hnuah inelna lian a hmachhawn ve leh ṭan chauh a ni.

Mipa singles inkhel dangah champion tura rinkai zinga mi Alexander Zverev chuan Austrian tlangval Dennis Novak chu 7-5, 6-2, 6-4 in a hneh a, tun thlatir lama khelh zawh tak US Open ang bawkin thlen san leh a tum ang.

German tlangval Zverev hi player beiseiawm zinga mi a ni a, mahse Grand Slam-ah a khel ṭha tawk lo ṭhin. US Open-ah khan final a lut thei a, a elpui Dominic Thiem lakah chak lo mah se a theihna sang tak a pho lang.

Seeded parukna Zverev chuan, "Paris khawpui kan luh hma khan tun season atan clay court tournament ka khel miah lo, a tir lamah kha chuan a harsa deuh. Mahse clay hi chu kan naupan lai 

aṭanga kan inkhelh tawh ṭhinna a nih avangin a kalphung ka man leh mai," tiin a sawi.

French Open hi May thlaa khelh tur kha ni mah se coronavirus vangin thla li ngawtin sawn tlai a ni a, inkhelh hun a danglam tak avang hian season danga boruak lum tak kha kuminah chuan a vawt mah mah. Pathianni khan 10 degree te a ni a, ruah a tlak deuh bawk avangin player ṭhenkhat chuan khaw vawt vangin harsatna an tawk.