Premier League a ngaihnawm tulh tulh Leroy Sane, Paul Pogba, Gonzalo Higuain
Premier League club-te'n sum an hmang hnem viau tawhin lang mah se a vawrtawp a thleng lo! Paul Pogba, Leroy Sane, Gonzalo Higuain leh player ṭha hming a la ri ring reng.
Khawvel ngaihven league-ah manager ropui leh footballer ṭha bik an awm belh zel a, inelna sang tak awm dawn avangin dan kengkawhtu lam pawh an khawng dawn. Premier League, English Football League leh Football Association te chuan thuchhuah inṭawm siamin English football-ah kalphung thar a awm tur thu an puang a, nungchang ṭha lo tan yellow card leh red card an ren dawn lo.
United-ah Pogba?
Ed Woodward chu China-ah a zin ve lo a, Jose Mourinho ho--tena an hmachhawn tur Borussia Dortmund leh Man-chester City hi lian mah se Manchester United executive vice-chairman tan tihtur pawi-mawh zawk a awm vang a ni.
Ed Woodward hian Juventus director Giuseppe Marotta leh Fabio Paratici bakah player agent Mino Raiola chuan transfer awm theih dan tur an sawi ho a, United dilna hmasa ber chuan Juventus beisei zat pound maktaduai tlem te chauhin a pha lo.
Khawthlang media te chuan English club-in pound maktaduai 100 leh a chetṭhat dan a zira pound maktaduai 13 pek belha an dilna chu Juventus lam hian an hnar a, Italian club hian pound maktaduai 100 baka a hnu lama pound maktaduai 8 pek ngei ngei an duh niin an tarlang. Chanchinbu hrang hrang ziah dan inang chiah lo mah se French midfielder hian United hi a zawm a nih ngai chuan khawvel player manto ber a ni dawn!
Pogba agent Raiola chuan a hnuaia player pahnih Zlatan Ibrahimovic leh Henrikh Mkhitaryan te chu United-ah a hruai lut tawh a, French midfielder pawh hi Juventus aṭanga chhuahtir a duh zawk avangin Mourinho hian a player duh hi a hmang thei ngei dawn niin a lang. An sawi zel dan chuan Pogba chungchang bikah chuan buaina awm lo a, club pahnih an inbiak fel theih chuan French midfielder hian kar khatah £250,000 hlawhin kum nga chhung atan contract a ziak dawn. Kum 23-a upa midfielder hian a club hlui United zawm a duh ang thoin Juventus-a cham zela Champions League khelh pawi an ti lo niin an sawi bawk.
Transfer hi a tak ram thleng tur chuan nghah leh hret a ngai dawn a, thuchiang erawh Real Madrid an inrawlh dawn lo. Zinedine Zidane chuan, "Pogba hi ka player duhzawng tak a ni a, club zawng zawngin player ṭha bik chu an duh vek a ni. Tunah erawh Juventus player a nih bakah kan squad a chhah lutuk hret bawk," tiin a sawi.
Transfer dang
Manchester City-in Leroy Sane an hnaih zel a, German winger hian English club nen mimal chungchang bikah chuan kum li chhung atana contract ziak turin an inrem tawh niin an sawi. Tuna an buaina chu Schalke-in an sum beisei zat pound maktaduai 42 chu City lamin an la phak lo deuh niin lang.
Schalke general manager thar Christian Heidel chuan, "Leroy hian nipui bazara chhuah a duhthu hi a tichiang tawh a, amaherawhchu Schalke lungawina ang thlapa a chhuah a ṭul a ni," tiin nghah rih a la ngaih tur thu a sawi.
Arsenal-in world class striker an la zawng reng a, Napoli striker Gonzalo Higuain nen an la sawi zawm zel a, hei erawh nghah rei leh deuh a la ngaih hmel.
Premier League aṭanga relegate Newcastle United-in player ṭha Moussa Sissoko leh Georginio Wijnaldum an kawl. Euro 2016 hmang ṭha Sissoko hian sawmtu a ngah ang bawkin Dutch winger Wijnaldum duhtu an tam. Season liam taa pound maktaduai 14.5-a PSV aṭanga Newcastle zawmtu Dutch winger hi Liverpool bakah Tottenham leh Everton ten an ngaihven mek.
Stoke City-in transfer apianga thawm nei lian West Brom striker Saido Berahino chu pound maktaduai 20 in an dil a, amaherawhchu Stoke manager Mark Hughes chuan an dilna chu hnawla a awm thu a sawi thung.
Card hmuh theih dan
Yellow Card
• Match official laka nungchang mawi lo lantir.
• Referee thutlukna uar taka khinglet.
• Hmaichhana official hmachhawn.
• Thutlukna khinglet tuma offical lama tlan.
• Official chunga ṭawng dan leh chet dan mawi lo.
• Thinrim vang ni lo pawha official khawih.
• Thuthlukna khingleta player pahnih emaw a aia tamin referee an hual a nih chuan a tlem berah player pakhat chu yellow card pek tur a ni.
Red Card
• Official chunga ṭawng dan leh chet dan mawi lo.
• Thinrim chunga offical khawih.