Hei le, MPL kai thar Ramhlun North chu
Ramhlun North FC chu an club din aṭanga kum thumna lekah Mizoram Premier League khel turin an inpet tling a, ṭantu nei ṭha club hi Mizoram club lian zingah I Day Football aṭangin an tâl ṭan ang.
Kum 3 chauh
Kum 2013 khan Ramhlun North FC hi din ṭan a ni a, Aizawl DFA hnuaia third division club ni turin an inziak lut. 2013-14 season hian second division-ah hmun ruak pakhat chu auction niin RNFC hian an chhang huai ber a, third divison-ah sulhnu an hnutchhiah lo.
Second Division-ah hian sea-son khatnaah Ramhlun North FC hi an champion nghal a, first division khel turin an inpetling.
Aizawl DFA hnuaia inelna sang berah Ramhlun North FC hian bul an ṭan chhe lo a, 2014-15 season-ah hian pathumna niin MPL4 Qualifier an khel pha lo chiah chiah. Amaherawhchu RNFC hian kum 2014 hian Serchhipa football inelna ngaihhlut L&L Memorial Football Tournament final-ah 1st.Bn MAP Academy hnehin an champion.
Season liam ta khan First Divi-sion league-ah pathumna an ni a, an dinhmun aṭanga thlirin MPL5 Qualifier khel pha lo mah se an chunga awm Aizawl FC Academy-in MPL an khelh theih loh chu an vanneihpui. Coach Lalruatliana (Tawia) kaihhruaina hnuaiah league-a an tluk loh Chhinga Veng FC chu 3-2 in an hneh a, MPL5 Qualifier hmachhawn dang Project Veng, Kolasib leh Champhai United chung-ah awmin MPL khel turin an tling.
Ṭantu nei ṭha
Ramhlun North manager K. Lalenghluna (Maenga) chuan, "Ramhlun North hi veng lian kan ni a, YMA member tamna ber te pawh kan ni ṭhin. Veng chhung mipui ṭawiawmna kan neih
ṭhat bawk avangin kan awmna division-ah hi chuan ṭantu kan nei ṭha ber zel a, MPL-ah pawh a nei ṭha ber pawl kan ni thei ang," tiin vengchhung mipui nen an thawhho ṭhat thu a sawi.
RN FC hian mumal takin team an kalpui a, Aizawl DFA hnuaia third division-ah an junior team an ziak lut. He team-a khel kum 18 hnuai lamte hian MPL5 Under 18 an hmachhawn dawn a, player ṭha zawk chherchhuah tumin mumal taka training an neihpui bawk.
Tawia hoin
MPL hi tawnhriat nei lo tana talbuai theihna a ni a, tualchhung football hriatchian a ngai. Ramhlun North FC coach Lalruatliana Sailo hi Mizo zinga AIFF D Licence instructor hmasa ber a ni a, MPL hmasa berah FC RS Annexe a enkawl tawh bakah FC Kulikawn tan a khelh tawh avangin Mizoram chhunga football inelna sang ber kalhmang hi a hrechiang ang.
Engtin zel?
Nipui bazarah bul an ṭan tlai avangin Ramhlun North hian Mizoram team-a hmun nghet chang thei player an lalut lo niin a lang a, amaherawhchu tawnhriat nei player leh rawlthar duhawm an inchawh pawlh mawi em avangin khelh awlsam an ni lo ang.
Goalkeeper-ah division hnuai lama an first keeper F. Lalruatfela elpui turin Liansangpuia (Chan-mari West FC) leh David Lalrin-puia (Aizawl FC Academy) te an lalut a, Vaivakawn rawlthar David-a hi MPL Under 17-a best keeper lo ni tawh a ni.
Ramhlun North hian defence leh midfield-a chhawr theih C. Ramdinmawia an lalut a, Armed Veng South player hi a khelh ṭhat ni chu ani aia ṭha an awm chuang lo. Team captain Lalramthlamuana hi MPL U17 hmasa bera best defender kha niin talent a nei ṭah tih chu a chiang tawh a, Mizoram inelna sang berah hian eng nge a thlen dawn tih a la hriat loh. Tlarhnunga lama player dang Khawkawn tlangval Lalmuanawma, Lawngtlai tlangval Lalruatfela leh New Serchhip left back Henry Lalhruaitluanga te hi hming chher chawp tur an la ni.
Midfield-ah MPL tawnhriat nei Zosangliana Sailo thla zar hnuaiah Vaiphai midfielder Lalchhuanpuia chevel hmuh a châkawm tawh hle. MPL5 Playoff-a Champhai United midfielder hian a theihna MPL-ah a pho chhuak thei a nih nghat chuan a hmuhnawm ngei ang.
Tlar hmaah tawnhriat nei pahnih B. Malsawmzuala leh MC Malsawmzuala-te bakah Vanrammawia Ngente an nei bawk. Kolasib striker VR-a hi a theihna thlirin hmabak êng tak a nei a, field sir lam aṭanga striker thlawptu tur Zembawk rawlthar David Lalrinchhana hi first division lamah chuan a thiamzia hmuhin a awm tawh.
Hming ziah hmaih thiang lo chu Vanlalthlamuana a ni a, Chanmari FCaṭanga an lakluh Thlamuana hian MPL-a best player ni thei turin theihna a nei a, chutihrualin season khat chhung tawp a cheṭha reng thei ang em tih zawhna thei chu a ni.
RAMHLUN NORTH FC
# Hming Koh Dan Permanent Address
Goalkeeper
1 Liansangpuia Sangpuia Dampui
2 F. Lalruatfela Nunna Ramhlun S-Complex
3 David Lalrinpuia Rinpuia Vaivakawn
Defender
4 Jerry Lalrinzuala J. Zuala Ramhlun Venglai
5 Lalramthlamuana Muantea Ramhlun South
6 Lalronghaka Nghaktea N.Lungpher
7 PC Lianhmingthanga PCA Tlangpui
8 Lalmalsawma Malsawma Zemabawk North
9 Lalruatfela Ruatfela Lawngtlai
10 Israel Laldingngheta Israel Salem Veng
11 John Lalduhawma John Ramhlun North
12 Lalrintluanga Marina Ramhlun North
13 Lalmuanawma Muanawma Khawkawn
14 Lalchhanchhuaha Fanai Achhana Siaha Vengpui
15 Henry Lalhruaitluanga Hruaitluanga New Serchhip
Midfielder/Winger
16 Zosangliana Sailo Chhaia Armed Veng South
17 C. Ramdinmawia Ramdina Armed Veng South
18 David Lalrinchhana David Tlau Zemabawk
19 Lalhmangaiha Tetea Ramhlun Vengthar
20 Lalruatkima Dosel Anggu Vaivakawn
21 Jerry F. Zonunsanga Jerry Lunglei
22 B. Hruailianthanga B. Hruailiana Sangau
23 Lalchhuanpuia Chhuanpuia Vaphai
Forward
24 MC Malsawmzuala MCA Siaha
25 Vanlalthlamuana Thlamuana Ramhlun South
26 Vanrammawia Ngente VRA Ngente Kolasib
27 B. Malsawmzuala Sawmtea Luangmual
28 Ricky Lalremsiama Remsiama Saron Veng