Allen a chhuak dawn, Reds-ah Wijnaldum?

Liverpool chuan an midfielder Joe Allen lalut tura Stoke City-in pound maktaduai 13-a an dawrna chu an pawm. Wales midfielder hi Swansea City leh Sevilla pawhin an duh nia sawi ni mah se Britannia Stadium lamah a kal ngei dawn niin a lang ta.

Reds fans tan Joe Allen chhuah tur thu hi hriat nuam ni lo mah se chanchin lawmawm dangin a deng zui nghal - khawthlang media-te chuan Reds-in Newcastle United midfielder Georginio Wijnaldum lakluh tuma pound maktaduai 25-a an dawrna chu Magpies hian an pawm niin an tarlang.

Mangṭha Allen

Wales international Joe Allen-a'n season hman zawh takah Liverpool-ah hmun a chang tam tawk lo a, league match riatah chiah inkhel bul a ṭan. Hetichung hian Euro-ah erawh Wales tan innghahna a ni a, Euro 2016 team of the tournament-ah lang phak hialin an ram hi semifinal a hruai thleng.

Kum 26-a upa midfielder hian June khan Anfield-a a hmalam hun chu chinfel thuai a duh thu a lo sawi tawh a, Reds boss Jurgen Klopp pawhin rei loteah chinfel a nih tur thu July thlatir khan a lo sawi tawh bawk - an sawi ang ngeiin an chingfel thuai dawn e.

Mahse, Klopp hian Stoke-in Allen an dawrna chungchangah erawh engmah sawi duh loin, "Joe hi player ṭha tak a ni a, footballer danglam bik a ni. Euro hma daih khan a ṭhat zia ka hre tawh a, European Championship hnuah ka hrechiang lehzual a ni. Vantlang hriata sawi tur dang erawh ka nei lo a, Europa League final hnu khan kan inhmu leh tawh lo," tiin chawlh hmang mek Allen chungchang a sawi chiang duh lo.

Wales tana vawi 31 inlan tawh midfielder hian Liverpool-ah season khat chiah contract a nei tawh a, June khan a club hlui Swansea chuan pound maktaduai 8-a laklet tumin dawr mah se Anfield club hian an hnawl. Pound maktaduai 13-a Stoke dawrna erawh an hnar thei lo niin a lang.

Allen leh Liverpool

Kum 16 leka upa a nih laia Swansea tana a match hmasa ber kheltu Allen hian Welsh club-ah hian season ruk hun a hman hnuin kum 2012 khan Liverpool a zawm a, Merseyside club hian Allen lalut tur hian pound maktaduai 15 an inseng.

Swansea-a Brendan Rodgers hnuaia lo khel tawh midfielder hian Reds lama a zui Irish manager hnuaiah hmun pawimawh chan chhunzawm mah se Jurgen Klopp-a hnuaiah erawh a tla tlum tawk lo a, German coach hian midfield laiah Jordan Henderson, Lucas, Emre Can leh James Milner te a duh zawk a, rawlthar duhawm Marko Grujic an nei leh tawh bawk.

Liverpool-ah season li hun a hman chhungin inelna hrang hrangah match 129 a inlan hman a, goal sarih a khung sak. Season hman zawh takah khan Reds tan league match 17 chiah a khel a, inelna hrang hrangah match 34 a inlan.

Reds-ah Wijnaldum?

Midfielder Georginio Wijnaldum manah Liverpool leh Newcastle United an inrem niin khawthlang media ten an tarlang a, a man zat tur hi pound maktaduai 25-a ni. Season hmasa lawka PSV Eindhoven
aṭanga pound maktaduai 14.5 a laluttu Magpies tan chuan kum khat hnua heti zata hralh hi hlawkna a ni.

Tottenham Hotspur pawhin an duh nia sawi Wijnaldum hi Reds chuan an hnena kum nga cham turin contract an zawrh a, Merseyside club-ah hian ruahmanna ang chuan ni hnih awh tur medical neih chiah a hmabak tawh.

Tu nge Wijnaldum?

Netherlands tana vawi 30 inlana goal ruk khung tawh Wijnaldum hi 2014-15 season-a Dutch Footballer of the Year dinhmun luah thei a ni a, player naran a ni lo tih chu a chiang.

Season hman zawh takah khan Newcastle tan league match 38-a inlanah goal 11 khungin a ṭhiante thun tur vawi nga a siam sak a, Magpies player zingah league-a goal khung hnem ber a ni. A goal khung 11 zinga pali erawh 6-2 a Norwich an sawp ṭuma a khung a ni a, a khelh ṭhat leh chhiat a inthlau ṭhin hle.

Dutch club langsar Feyenoord-ah bul ṭanin inelna hrang hranga vawi 134 a inlan sakah goal 25 a khung sak. 2010-11 season-a goal 14 a khung hnuah PSV a pan a, a hawikir tawh lo. Dutch club tan hian season li a khelh chhungin match 152 inlan sakin goal 56 a khung sak a, a ṭhiante thun tur vawi 23 a siam sak.

Magpies a zawm hma season-ah PSV tan match 42 a inlanah goal 18 khungin a ṭhiante thun tur vawi nga a siamsak a, Dutch football-a a thiamna ang tak taka a khel chhuak thei a nih chuan Liverpool tan player ṭangkai a ni ang.