Dortmund-ah 'fapa tlanbo' Mario Gotze a kir

Borussia Dortmund chuan Bayern Munich-a season thum hun a hman hnuin forward Mario Gotze an lalet leh ta. Germany international hian Signal Iduna Park-ah hian medical chiah a hmabak tawh a, kum li cham turin contract a ziak ang.

Kum 2013-a a hunlaia Ger-man transfer-a pawisa tamna ber pawl ni tura pound maktaduai 31.5 vela Bayern zawmtu for-ward man zat hi tarlan ni lo mah se pound maktaduai 22 bawr vel nia ngaih a ni.

Dortmund CEO Hans-Joa-chim Watzke chuan, "Kum 2013-a kan club a chhuahsan a-
ṭang khan engtikah emaw chuan Gotze hi a lo kir leh rinna lian tak ka nei a ni," tiin an hnena kir kum 24-a upa forward chu a lo lawm.

Hmanah chuan...

Germany tan vawi 56 inlana goal 17 khung thei forward hian Borussia Dortmund-ah a career bul a ṭan a, Bayern Munich a pan san hmain inelna hrang hrangah vawi 116 inlanin goal 31 a khung sak a, Bundesliga nomawi pahnih chawiin German Cup-ah a champion pui bawk.

Kum 2013-ah Champions League final-a Bayern Munich an hneh loh vanga Dortmund fan-te rilru na pawh a dam fel hmain Bayern a pan san a, Pep Guardiola enkawlna hnuaia khelh a châk vang niin sawi mah se Dortmund fan-ten an hmelma club a pan avangin an ngaidam thei lo - tunah engtin tak lo lawm ang maw?

Hlawhtlinna leh Hlawhchhamna

Gotze-a'n Bayern Munich-a season thum hun a hman chhung-in Bundesliga nomawi a chawipui vek a, FIFA Club World Cup (1), UEFA Super Cup (1), German Cup (2) chawipui bawkin a beisei ber Champions League-ah erawh season thum chhung a zawnin semifinal-ah an tla vek!

Bayern-a a season hmasa pa-hnihah Gotze-a'n inkhelhna hmun chang ṭha viau mah se a season thumnaah erawh hliam vangin a talbuai a, a dam hnuah pawh beisei a phak loh chhunzawm avangin league match 14 chiah inlanin goal thum a khung a, inelna hrang hrangah vawi 21 inlanin goal ruk chiah a khung.

Germany-in 2014 World Cup-a champion nomawi an chawi theih nana goal khungtu forward hian season duhawm lo tak a hman hnuah a thiamna neih let leh beiseiin a club hlui lam a hawi a, tunah chuan Dortmund player a ni leh dawn ta.