Ancelotti kaihhruai Bayern-in City an hneh
Nilaini zan khan Carlo Ancelotti-a'n a vawi khat nan Allianz Arena-ah Bayern Munich kaihruaiin Manchester City chu minute 76-naa Erdal Ozturk-a goal hmangin an hneh. Italian manager ho hian an friendly match hmasa berah German club tenau SV Lippstadt 08 chu 4-3 in khualmualah an lo hneh tawh bawk.
Bayern leh City inkhel hi friendly ni mah se English club hi Pep Guardiola-a'n a ho avangin ngaihven a hlawh a, Bavarians ṭantuten coach kal chhuak ta Spanish manager hi an lo lawm nghe nghe.
German champion-in inkhel an thunun zawk a, Austrian star David Alaba goal khung tur chu Willy Caballero-a'n ṭha takin a dang. City keeper hian American forward Julian Green goal khung tur chu ṭum hnih ngawt a dan sak leh bawk. Rawlthar rual tamna City an
ṭang tluan thei lo a, Hoffenheim Academy chhuak Erdal Ozturk goal hmangin Bayern Munich an chak.
City tan player thar Oleksandr Zinchenko chu first half-ah a inlan a, Ilkay Gundogan leh Nolito te erawh an la inlan lo. Pep Guardiola hote hian China an pan ang a, Thawhṭanniah Manchester United an hmachhawn ang. Jose Mourinho hote an hmachhawn hunah Sergio Aguero, David Silva, Nolito, Raheem Sterling leh Joe Hart te'n squad an zawm tawh ang.
Eng nge an sawi?
Bayern manager Carlo Ancelotti chuan, "Allianz Arena leh Bayern ṭantu te hi ka lo hmelhriat tawh a, team ṭha Manchester City nena kan inkhel tur hi school-a ka ni hmasa ber ang tur maiin ka phur a ni. Season thar atana inpuahchahna chauh a ni nachungin kan khel ṭha a, hmasawn zel turin hun kan la nei bawk," tiin an khelh dan chungchang a sawi.
Manchester City manager Pep Guardiola chuan, "Helai hmuna ka lo let hi ka lawm a, ka rawn thlen khan ka chenna a rawn kir leh ang mai ka ni. Kei leh ka chhungten kum thum chhung hun ropui tak kan hmang a, ṭhian ṭha tam tak ka hmu bawk. Bayern an chak avangin ka lawmpui - coach, player leh fan ropui takte hi an hmalam hun atan duhsakna ka hlan a, in chetdan hi ka lo thlir reng dawn a ni," tiin a club hlui chungchang a sawi.