Boro-in Negredo an lalut

Season thar aṭanga Premier League khel tur Middlesbrough chuan Valencia aṭangin striker Alvaro Negredo chu season khat chhung atan loan-in an hawh a, Borussia Dortmund defender Neven Subotic erawh medical a paltlang loh avangin an lalut lo thung.

Khawthlang media ṭhen-khat chuan Boro hian Subotic hi lalut tawh ang hialin tarlang mah se medical a patlang zo lo a, Serbia international hi a nak ruh hliam vangin 2017 thleng a inkhelh theih a beiseiawm lo tih hmuh chhuah a ni.

Spain tan vawi 21 inlana goal 10 khung tawh Negredo hi Premier League-ah a mikhual lo. Kum 2012-14 khan Sevilla aṭangin Manchester City a zawm a, Premier League no-mawi chawipuiin inelna hrang hranga vawi 48 a inlanah goal 23 a khung sak.

Kum 30-a upa striker hi City aṭangin Spain-ah kir lehin Valencia tan a khel a, Spanish club tan hian season hnih chhungin match 76 a inlana, goal 18 a khung. Boro-ah hian Valencia tana a khelhpui ṭhin, tun nipui bazar-a Boro pan ve tho defender Antonio Barragan nen an khel dun leh dawn a ni.