Leicester City Morgan a nghet; Mahrez a chiang lo? Everton-ah Walsh

Premier League champion Leicester City-in nipui bazar-ah thawm an nei ring zel a, an thawm neih dan erawh thu lawmawm leh lawmawm loh a inchhawk reng - Foxes fan ten transfer bazar tawp hlan an nghakhlel hlein a rinawm.

Foxes-in Premier League nomawi an chawi theih nana goal 24 khungtu Jamie Vardy-a'n Arsenal hnawlin Leicester tan rinawmna thu a tiam a, Foxes fan-te hlim nui ri pawh a reh fel hmain midfielder N'Golo Kante-a'n pound maktaduai 30-in Chelsea a zawm san.

Professional Footballers' Association Player of the Year Riyad Mahrez chu chhuak tur anga sawi reng a ni a, coach Ranieri chuan Algerian winger hi a chhuah loh tur thu a sawi thung. Hetiang boruak karah hian 'Captain Morgan' tia an koh ṭhin captain Wes Morgan chuan King Power Stadium-ah June, 2019 thleng khelh chhunzawm turin contract thar a ziak thung.

Morgan a nghet

Kum 32-a upa Morgan-a'n season thum dang Foxes tan rinawm a tiam a, a kum zat ngaihtuahin King Power Stadium-ah a football nun a mangṭha a nih pawhin a mak lo ang. Jamaica international hi season hman zawh taka Foxes-in league nomawi an chawina kawnga player pawimawh a ni a, Premier League match-ah minute tin a khel kim vek.

January 2012-a Nottingham Forest aṭanga Foxes zawmtu defender chuan, "Leicester-ah ka hmalam hun ka hmang zel thei tur hian min ti lawm a, mi zawng zawngin he club tana khelh nuam ka tihzia chu an hria a ni," a ti.

Foxes tana league match 182 khel tawh defender chuan sawi chhunzawmin, "He club tana Premier League nomawi ka chawi kha ka hre reng tawh dawn a, tunah pawh hian nimin ang mai khan a la chiang a ni. Tunah chuan kan nomawi humhim tura theihtawp kan chhuah a hun leh tawh a, Champions League-ah eng ang chiah nge kan nih fiahna hmachhawn a hun tawh bawk a ni," tiin a phur hle.

Leicester manager Claudio Ranieri chuan, "Hruaitu ṭha leh huaisen a ni a, hmachhawp ropui tak kan neih avangin he team hian kan mamawh a ni," tiin a captain chu contract thar an ziahpui chhan a sawi.

Mahrez a chiang lo

Kar hmasa lawkah Ranieri-a'n Mahrez a chhuah loh tur thu a sawi a, Italian manager thusawi hnu lawkah Mahrez-a agent chuan a player hi a chhuah mai theih thu a sawi ve leh thung. Tunah erawh Leicester-in Mahrez-a chungchangah thu thar an nei leh tawh a, coach Ranieri chuan a player pawimawh hi chhuahtir an tum loh thu leh an hnenah a hlim thu a sawi nawn leh tawh.

Thawhlehni zan khan Lei-ces-ter City hian pre-season friendly match Oxford United nen an khel a, League One club laka 2-1 a an chakna inkhelah hian Riyad Mahrez chu inkhel bul ṭantu zinga mi a ni.

Inkhelh zawhah Ranieri chuan a player thar chungchang hi sawiin, "Vardy-a'n contract thar a ziak kha a ropui a, Mahrez pawh chutiang tho chu a ni ang. Mahrez tel lo emaw, Kante tel lo pawhin football chu a ngai reng a, mah se Mahrez erawh kan hnenah a cham zel ang tih ka chiang a ni. Players tumah ka hralh tawh dawn lo, tuna mi hi chu kan awm ho vek tawh ang," a ti.

Mangṭha le Kante

Leicester City-in Premier League nomawi an chawina kawnga player pawimawh ber pawla chhal ngam chu N'Golo Kanté a ni. French midfielder hian season hmasa ṭan dawn khan Ligue 1 club Caen aṭangin Foxes hi pound maktaduai 5.6 velin a zawm a, season a zawh meuh chuan pound maktaduai 30 man midfielder a ni tawh!

Italian manager chuan Kante chungchang hi sawiin, "Ka player zingah Kante chiah kha chhuah duh awmchhun a ni a, a rilru ka hriatthiampui em em. France rama club tenau aṭangin a lokal a, season duhawm tak a hmang bawk. Kan hnenah kum khat tal chu cham leh se ka duh a, Champions League tawnhriat nen hma a sawn dawn tehlul nen chhuah a duh zawk miau si. Mahse, chelh luih ka duh lo a, duhsakna ka hlan a ni. Player hlim lo chu ka tana khel turin ka duh lo," tiin Kante a chelh loh chhan a sawi.

Walsh a chhuak hnai

Leicester City tan chanchin lawmawm lo dang a awm belh a, chu chu assistant manager leh head of recruitment Steve Walsh-a'n Everton zawm a tum thu hi a ni. Chelsea scout dinhmun pawh lo chelh tawh Walsh hi Foxes-a Riyad Mahrez, Jamie Vardy leh N'Golo Kante laluttu ber a ni a, Blues a awmlai khan Gian-franco Zola leh Didier Drogba hmuchhuaktu a ni bawk.

Everton neitu thar Far-had Moshiri-a'n coaching depart-ment lam a ngai pawimawh a, Walsh hma hian club manager turin Ronald Koeman a lalut tawh. Dutch manager thawh-pui tur hian Walsh hi a duh a, November 2011-a Foxes zawm-tu Walsh hi Everton sporting director dinhmun chelhtir a tum nia sawi a ni. Leicester tan chuan channa nasa tak a ni ang.