Celtic an tlu rei lo

Liverpool manager hlui Brendan Rodgers-a'n Celtic-a enkawl hnua competitive match a hmachhawn hmasak berah hnehna chang zo lo mah se a vawi hnihnaah erawh tlawm nawn a duh lo - Nilaini zan khan Champions League third qualifying round lut turin Lincoln Red Imps chu 3-0 in an sawp.

Gibraltar club Lincoln Red Imps player-te hi taxi driver, police offier leh hna dang thawk paha inkhel an ni hlawm a, first leg-ah Celtic hian 1-0 a an lo ngam tawh loh avangin an mualpho hle. Mahse, Celtic Park-a inkhelah erawh Scottish club hian ze dang an chhuah a, fans 50,000 chuang pungkhawm hmaah an theihna tak tak an pholang.

Inkhel ṭantirh aṭang-in Celtic-in inkhel an thu-nun nghal a, Sweden international Mikael Lustig chuan minute 23-naah goal hmahruai a khung nghal. Minute thum a liam hman awrh a, Red Imps insiamṭhat hmain Celtic bawkin goal an khung. Scottish striker Leigh Griffiths chuan mualneitu team tan goal hnihna a khung a, minute 29-naah Patrick Roberts chuan goal thumna a khung ve leh bawk.

Celtic tan Moussa Dembele leh Griffiths ten goal khungna hun ṭha dang nei ve leh bawk mah se goal-ah an chantir thei lo a, Scottish club-in inkhel pahnih belhkhawmah 3-1 in hnehna an chang. Celtic hian Champions League third qualifying round-ah Kazakhstan club Astana an hmachhawn leh ang.

Rodgers-a'n Celtic a zawm hmain Ronny Deila-a'n season hnih chhung a zawnin league-ah Celtic champion pui mah se Champions League a khelhpui theih loh avangin a hna a bansan. Rodgers-a'n Deila tih theih loh ti turin round hnih a la hmabak a, third qualifying round-ah nikuma Champions League khel pha Astana hi a hneh thei a nih chuan playoff ah inlan a la ngai cheu dawn a ni.