Villa-in Petrov contract an zawrh lo

Aston Villa chuan an captain hlui Stiliyan Petrov chu inkhel turin lo kir thei leh mah se contract thar an zawrh tawh lo a, mah se club-ah nihna pawimawh chelh chunzawm turin an ti thung.

Bulgaria midfielder hlui hi 2012 March thla khan thisen cancer tih hmuh chhuah a ni a, a natna an hriatchhuah aṭanga thla 14 hnuah inkhelh a chawlhsan. Enkawl a ngaih nasat zual laiin inkhel thei lo mah se Petrov hian beidawng duh loin professional football khelh leh a tum a, tunah hian season thar inbuatsaih nan Villa camp a tel tura sawm a ni.

Manager Roberto di Matteo chuan, "Stiliyan hi kan club tan mi pawimawh a ni a, player dangte tan chona siamsaktu ṭha tak a ni. Inkhel turin sawm tawh lo mah ila club tana hna pawimawh thawk zui turin kan sawm thung, an chhungkuaa an sawiho hnuah thutlukna a siam theih ka beisei," tiin a sawi a, kum 37-a upa Petrov hnathawh tur hming hi tarlan a ni lo thung.

Kum 2006 khan Petrove hian Martin O'Neill a hnuai khel turin pound maktaduai 6.5 in Villa Park a pan a, match 219 khelh sakin an player pawimawh a ni ṭhin.