Nadal a inringtawk

Spanish tennis player Rafael Nadal chuan hun rei tak chhung inkhel thei tawh lo mah se Rio Olympic atan inrintawkna a neih thu a sawi chhuak.

World number 4 Nadal hi banrek veilam na vangin a chawl mek a, May 27-a French Open second round aṭanga a inhnuhdawh hnuah court chhungah a hmel a la inlan leh lo. A hliam hi a dam mek a, practice a nei leh tawh. Kar leha khelh tur Toronto Meaters hi atan Olympic inbuatsaihna hun ṭha tura ngaih ni mah se a la inlan thei dawn rih lo.

Grand Slam vawi 14 champion tawh Na-dal chuan, "Rio-ah ṭha taka ka inkhelh theih ka beisei. Inelna neih hmain chawlhkar hnih leh a chanve inbuatsaihna hun kan la neihah hian hmasawnna hmuh tur a awm ka ring. Ka lo sawi fo tawh angin hringnunah chuan thil hi kan duh danin a kal vek lo a, hei erawh kan pawmthiam a ngai," tiin a sawi.

2008 Beijing Olym-pic-ah khan Nadal hian Spain tan gold medal a dawng a, 2012 London-ah erawh hliam vangin a inlan lo - kum riat hnuah tun hma lama a lo ropui tawhna ang kha nei leh theih a inbeisei mek.

Kum 30-a upa Nadal hi an ram flag kengtu (flag-bearer) a ni dawn a, single-ah a inlan dawn bakah Marc Lopez nen double-ah an
ṭang dun bawk ang.