Fiorentina-ah Gomez a kir dawn

Mario Gomez chu Turkey champion Besikt-as lamah a kir tawh dawn lo. Germany striker hian season tharah chuan a club pangngai Fiorentina tan a khel leh ang.

Kum 31-a upa Gomez hian season hmasa khan Serie A club Fiorentina aṭangin Istanbul club hi loan hmangin a zawm a, match 41 a khelh aṭanga goal 28 khungin Turkish league title a lak pui.

Tun dinhmunah Tur^-key sorkar paihthlak tum-in tualchhung buaina a chhuak mek a, sipai 2,839 chuang zet man an nih tawh bakah mipui 161 chuang an thi tawh.

Fiorentina leh Besiktas inrem danah chuan Gomez hian a duh a nih chuan a loan hun hman zawh hunah a nghetin Turkey club hi a zawm thei ang tih a ni. Mahse, Bayern Munich striker hlui hian ram buaia inkhelh ai chuan Italy lama kir leh a thlang ta zawk.

Turkey-a chhuahsan tur thu sawiin Gomez chuan, "Stadium dangdai leh fans ropui tak takte hmaah ka inkhel tawh dawn lo. Ka tan chuan thutlukna siam harsa tak ni mah se Besiktas fan-ten min hriatthiam ngei ka beisei, football vang a ni lo a, tun hnai ramchhung thil thleng vang zawk a ni," tiin politics buai kara inkhelh a duh loh thu a sawi.

Germany tana match 68 a khelh aṭanga goal 29 khung tawhtu striker hi 2014 World Cup-ah khan thlan zingah tel lo mah se Euro 2016-ah khan koh a ni ve leh a, goal hnih khungin an ram chu semifinal a hruai thleng.