England tan 'Big Sam' Aia lian an awm lo

Football Association-in Roy Hodgson thlaktu tur an zawnna chu a tawp ta - Eng-land manager hna chelh turin 'Big Sam' tia hminglem an phuahsak Sam Allardyce aia hming lian zawk an awm lo.

Sunderland boss hi FA hian kar hmasa khan indawrna an lo neihpui tawh a, ani bakah hian Hull City manager Steve Bruce an dawr bawk. England manager tur hian Bournemouth manager Eddie Howe leh USA coach Jurgen Klinsmann te hming pawh lamrik nimah se Sam Allardyce-ah an inlungrual ta ber a ni.

England manager thar ruat tur hian Football Association chuan member pathum awmna panel a din a, FA vice chairman David Gill, FA technical boss Dan Ashworth leh chief executive Martin Glenn-te chu member niin anni pathum hian 'Big Sam' hi an duh ta ber a ni.

Football Association board meeting chu tukin zing dar 2:30 khan Wembley-ah
ṭhut khawm a ni a, England manager atana Sam Allardyce ruat a nihna hi an pawm ve leh phawt ang a, hemi zawhah hian mipui hriatah official taka puanzar a ni ang.

Big Sam hi kum 2006 World Cup zawha Sven-Goran Eriksson ban hnuah England manager tura biak a lo ni tawh a, mah se FA chuan hetih laia Bolton Wanderers coach ai hian Steve McClaren an thlang zawk. Kum 10 a liam leh meuh erawh chuan Sam Allardyce-a'n hnawl a hlawh tawh bik lo.

Kum 1994-a Blackpool aṭanga manager puitling hna chelh ṭantu kum 61-a upa manager hian Premier League-ah club hrang hrang match 467 chhung a enkawl tawh a, manager zingah Sir Alex Ferguson, Arsene Wen-ger leh Harry Redknapp te chu Premier League-a club kaihhruai hnem kawnga a tluk loh awmchhun an ni.

Player a nih laia Sunder-land, Millwall, Coventry, Hud-dersfield, West Brom, Preston North End, Irish club Limerick, US club Tampa Bay Rowdies tana khel ṭhin defender hlui hian England tana a inlan miah lo chu a career-a pawi a tih awmchhun niin sawi ṭhin mah se tunah erawh a khelh phak lohna ram team a enkawl dawn ta.

Big Sam bihchianna

• Manager a nihna angin nomawi lian­tham chawi a la nei lo a, Premier League khel turin Bolton leh West Ham a hruai thleng thung.

• Premier League-a a team a kaih­hruaiah 33.6% hnehna a chang thei.

• Season laklawha a enkawl Sunderland chu January khan tla thei dinhmunah ding mah se a match hnuhnung 11-ah vawi khat chiah tlawmpuiin Premier League-ah a inhamtan pui.

• Season hman zawh taka Black Cats possession chu chawhrualin 39.94% a ni a, an ball pass zinga 21% chu long pass a ni.

• Big Sam hi England manager nghet 15-na a ni a, a competitive match hma­sa ber tur chu Slovakia nen September 4-a World Cup qualifier an khelh hunah a ni ang.

• English manager hian Blackpool, Notts County, Bolton Wanderers, Newcastle United, Blackburn Rovers, West Ham leh Sunderland a enkawl tawh.