Olympic-ah Russia infiammite tan hmun a awm lo

Court of Arbitration for Sport (CAS)-in an thutlukna an tichhuak a, Russian infiammi (track and field athletes) 68 zet chuan Olympic a tel turin Rio an pan ve thei dawn ta lo niin a lang.

International Association of Athle-tics Federations (IAAF) chuan Russian Athletic Federation (RAF) chu anmahni hnuaia infiammiten damdawi hman phal loh an hriatpuina hnuaia an hman avangin Russian infiammite chu Olympic-a tel ve an rem tih loh thu kar liam ta khan a lo puang tawh. Russian Olympic Committee (ROC) leh infiammi 68 te chuan CAS hnenah an hremna hi suttir turin zualko mah se infiamna chungchanga thubuai ngaihtuahtu sang ber hian a pawm sak lo.

Thutlukna chu

ROC leh infiammite pawhin IOC thutlukna sut beiseiin CAS hi pan mah se Olympic-ah an tan hmun a awm lo niin a lang. CAS chuan Russian infiammite hrem thu hi, "ROC-in IAAF dan siam an bawhchhiat avangin Olympic Games-ah an aiawh tur Russian track & field athletes an tirh a rem ve lo," tiin thuchhuah an siam.

IAAF chuan CAS thutlukna chu a dik an tih thu an sawi rualin court thutlukna chu hnehnaah an ngai lo. IAAF president Sebastian Coe chuan, "CAS thutlukna hi kan lawm rualin hlawhtlinnaah kan ngai lo. Infiammite inelna liana tel phal loh hi kan duh dan a ni lo. Rio zawhah hi chuan Russia ramin infiamna thianghlim taka an hmachhawn theihna turin hma kan lakpui ang a, an pawl leh an infiammite hi khawvelah an rawn lang leh ang," tiin infiammite ni loin damdawi hman phal loh zawk chu an do thu sawi.

Kawng a la awm?

Damdawi hman phal loh chungchanga mualpho Russia infiammite chu an ram hming ni loa tel phalsak an ni a, amaherawhchu International Olympic Committee (IOC) dan siam an paltlang a ngai - chung zingah chuan ram pawna vawi engemaw zat test hmachhawn a tel.

Russian infiammi 800m runner Yuliya Stepanova leh long jumper Darya Klishina te chuan IAAF kawng hawnsak chu remchangah lain an dan siam hmanga fiah nawn an ngam a, CAS pawhin dan zawm thei chu an tel theih tur hi an thuchhuahah an sawi tel bawk.

Amaherawhchu CAS thupuangtu chuan panel-a ṭhute hian Olympic hi August 5-ah ṭan a ni tawh dawn avangin dan zawm vek tur chuan hun a awm tawh loa an rin thu a sawi tel bawk.

International Olympic Committee chuan Thawhlehni khan Russian aiawha tel turte chu hrem turin thutlukna an siam tawh a, chutihrualin engkim tihchian hmain CAS thutlukna an ngaichang phawt. Pathianni khian emergency meeting vawi hnihna an nei ang a, chumi hunah chuan engkim a chiang ang.

Thil awm dan

Nikum November thla khan WADA chuan 2012 London Olympic-ah khan Russian infiammiten damdawi hman phal loh an hmang ngei tih International Association of Athletics Federations (IAAF) hnenah report an lo thehlut tawh. Kumin June thla khan IAAF chuan Rio Olympic atan hian All-Russia Athletic Federation (ARAF) chu 'track and field' bikah an anthlete-te tel an remtih loh thu an lo sawi tawh.

Hemi hnuah hian Russia's national anti-doping laboratory head hlui Grigory Rodchenkov chuan Sochi Games-ah khan infiammi damdawi hman phal loh laka fihlim lo 15 chuan medal an dawn phah a, heng zingah hian gold medal panga a tel thu a sawi chhuak. Tun dinhmunah Rodchenkov hi United States sorkar venhimna hnuaiah a awm mek.

WADA hnuaiah McLaren-a kaih-hruaiin Russia hi zirchiangin ni 57 chhungin an thil hmuh chu puanchhuah turin an buatsaih hman a, September 10, 2014 aṭanga December 2014 inkar khan Moscow Laboratory-ah infiammite zun (urine) enfiah tura an lakluh tawh chu midang zun thianghlim zawk nen thlakthleng a ni tih thlengin an hmu chhuak.

An thil hmuh chhuah an tarlan dan chuan Russia hian kum 2011 tawp lam aṭang khan he thil hi a lo buaipui tawh a, 2012 London Olympic bakah 2014 Sochi Winter Olympic-ah te khan an infiammite ṭhatna tura an ngaih chu dan kalhin an lo kalpui tawh bawk.

Hlawhltlin duh luatah

2008 Beijing Summer Olympic-ah khan pakhatna China (51) leh pahnihna United States (36) te chu Russia hian gold medal 23 chauh an lak avangin an phak lo hle. Kum li hnuah Russia-in hmasawnna an nei chuang lo a, an gold lak zat chu pakhatin a kiam.

2014 Winter Olympic kha Russia khawpui pakhat Sochi-ah nghah niin a thlengtu ram hian gold 13 lain pakhatna an ni a, an elpui US chungah awmin hlawhtlinna ropuiah an ngai - mahse, hei hi an mualpho bul ṭantu mai a ni zui ta!