Beiseina nen India-in Rio lam a hawi

Khawvela infiammite intawhkhawmna lian ber Summer Olympic chu August 5-21, 2016 hian Brazil khawpui Rio de Janeiro-ah neih a ni dawn. India chuan
ṭum dang zawng aiin beiseina a nei sang a, medal tam zawk dawn beisei chungin Indian Olympic Association (IOA) chuan infiammi 121 a tir thei dawn.

Hmeichhe hockey team-ah H. Lalrinfeli chu standby-ah dah a ni a, Lungleng South nula chiah hi Mizoram beiseina neih chhun niin tun dinhmunah chuan Mizo infiammi zingah Olympic-a India aiawh pha an awm lo.

1900 Paris Olympic-ah khan India tan Norman Pritchard chu amah chauhin a lo inlan tawh a, Calcutta tlangval hian 200 metres hurdles leh 200 metres intlansiak-ah te silver medal dawngin India mai ni lo Asian ram zingah Olympic-a medal dawng thei hmasa ber a ni.

Pritchard-a'n India tan kawng a sial hnu kum 1920 aṭang khan Summer Olympic Games neih a nih apiangin India chu a la inlan ve ziah a, a pumpuiah Indian athlete-ten medal 26 an dawng tawh. Olympic chanchinah India hian gold pariat, silver paruk bakah bronze 12 a dawng tawh. Kum-in-ah hian ṭum dang zawng aiin infiammi an fehchhuak hnem dawn - 2012 London Olym-pic a kal zat 83 aiin 38 zetin an tam dawn.

2008 Beijing Olympic Games-ah khan Abhinav Singh Bindra chuan 10m Air Rifle-ah gold medal a dawng. Punjab tlangval hi India infiammi mimal zinga gold medal dawng thei hmasa ber a ni - Olympic hrim hrimah India tan kum 1980 a mipa hockey team pakhatna an nih hnua pakhatna ni leh thei hmasa ber a ni.

India-in hma a sawn zel a, 2012 London Olympic-ah khan medal paruk a la, heng zinga pahnih chu silver niin bronze pali a ni thung - hei hi India tan chanchin lawmawm niin infiamna khawmpui liana a chetṭhat ber ṭum a la ni hial. Kuminah hian Badminton, Hockey, Shooting leh Boxing te hi medal dawn beisei sanna an ni. Athletics, Wrestling, Archery, Table Tennis, Tennis, Golf, Swimming, Weight-lifting, Gymnastics, Judo leh Rowing te hi an inlanna tur dang a ni bawk.

Bihchianna: Athletics

Indian athlete Rio pan tur 37 zinga 20 chu mipa niin hmeichhia 17 an ni thung a, an inlanna tur zingah marathon, 50-km walk, 20-km walk, discuss throw leh shot put bakah 3000m steeplechase, 800m, 100m, 200m leh shotput te chu a langsar zual an ni.

200m bikah hian Indian sprinter-te an inlan lo rei tawh hle a, kum 36 hnua a vawi khat nan he inelnaah hian Dharambir Singh a inlan dawn. Haryana tlangval hian champion lai Usain Bolt a hneh theih a inbeisei thu a sawi.

Kum 27-a upa Dharambir Singh chuan, "He inelnaah hian Bolt hmu turin ka kal dawn lo a, midangte nena intihsiak tur kan ni, a pawimawh ber chu kan ram tan a ṭha thei ang bera tlan a ni ang. August 16 hian ka tan inelna a inṭan ve dawn chauh avangin inbuatsaihna ka la ngah a, champion lai hneh ngei ka tum ang," a ti.

Dharambir Singh hian nikum khan Wuhan-ah 200m hi 20.66sec chhungin a lo thleng tawh a, tun thla thla tira Bengaluru-a Indian Grand Prix neih zawh takah khan 20.45sec chauh hun hmangin national record a siam. Hetihlai hian 2009 World Championship-a Bolt-a'n world record a siam tawh 19.19sec tluk tur erawhin hmabak a la ngah hle.

Hockey

India mipa hockey team hian an hmelma leh elpui ni bawk champion lai Pakistan 4-2 a hnehin 2014 Asian Games champion an ni a, Rio a inlan turin Olympic vawi ruk champion tawh team hian direct ticket an nei. Kum 16 zet an champion tawh lohna hmuna an hlawhtlin leh tak avangin kuminah hian beisei an nei sang. Hmeichhe team pawh kum 36 hnuah an ilan ve leh dawn bawk.

Mipa leh hmeichhe team-ah hian player 16 ve ve koh an ni a, inhliam palh emaw harsatna dang nei an awm palh thuta khel thei tur (standby) player pahnih koh tel an ni. H. Lalrinfeli chu standby zingah hian a tel a - England, New Zealand, South Africe leh Australia-ah pawh lo inkhel tawh Mizo nula hi Olympic hockey inelnaah a inlan theih dawn leh dawn loh hriat ni rih lo mah se Rio-ah a kal ve dawn chiang thung.

Tennis

1996 Atlanta Olympic-ah khan India tlangval Leander Paes-a'n single-ah bronze medal a lo dawng tawh a, he thil hi India tennis chanchinah theihnghilh theih a ni tawh lo. Kum 43-a upa Paes hi a vawi sarih nan Olympic-ah a inlan leh dawn a, Rohan Bopanna nen double-ah an inkawp ang.

Hmeichhe lamah double world number 1 nilai Sania Mirza leh kum 22-a upa Prarthana Thombare te an ṭang dun bawk ang. Anni pahnih hian 2014 Asian Games-ah khan bronze medal an la. Grand Slam double vawi thum champion tawh Mirza hian Olympic-ah hnuhma a la nei ropui hran lo, tunah hian kum 29-a upa a nih tawh avangin kumin hi a tan hun ṭha hnuhnung a ni tawh mai thei.

Badminton

Badminton World Federation chuan May 5, Ningani khan Rio Olympic a inlan thei tur badminton player hming a puang a, India hmeichhe player pali Saina Nehwal, PV Sindhu, Jwala Gutta leh Ashwini Ponnappa bakah mipa player Kidambi Srikanth, Manu Attri leh Sumeeth Reddy te hming a lang.

Olympic-ah hian single-ah ram pakhatin player pahnih an nei thei a, mah se ram aiawh turte chu world ranking-ah a sang 16 zinga an tel a ṭul thung. India hian kumin hian hmeichhe single-ah world number 5 Saina leh number 10 Sindhu te a nei dawn. 2012 London-ah khan shuttler panga lo tir tawhin kumin hi Olympic chanchina India-in shuttler a tirh hnem ber ṭum a ni.

London Olympic-ah khan kum 26-a upa Saina hian bronze medal a dawng - Indian star zinga Olympic badminton inelnaa medal la thei hmasa ber leh awmchhun hian kuminah beisei angin khel ṭha lo mah se June thla khan Australian Open title a la thei a, inrintawkna a nei ang.

Shooting

India infiamna chuan 2008 Beijing Olympic-ah khan bung thar a kai. Abhinav Bindra chuan India infiammi zinga mimala Olympic gold medal dawng thei hmasa ber ni turin 10m air rifle-ah pakhatna a ni. Punjab tlangval hi a vawi nga nan Olympic-ah a inlan dawn a, tun ṭumah hian India flagbearer a ni dawn.

Kum 33-a upa Abhinav bakah hian 2012 London-a 10m air rifle bronze medal dawngtu Gagan Narang chu Rio-ah hian 50m rifle prone leh 50m three position-ah te a inlan dawn bawk. Anni pahnih bakah hian shooter 10 an kal tel dawn - Athletics leh Hockey tih lohah chuan Shooting hi mimal hming lan tamna ber a ni ang.

Boxing

India aiawh turin Shiva Thapa (Bantam-weight) chuan 2016 Asia & Oceania Qualifying a paltlang a, Manoj Kumar (Light welterweight) leh Vikas Krishan Yadav (Middleweight) te chuan 2016 AIBA World Qualifying Tournament paltlangin Rio ticket an nei bawk.

Kuminah hian India beisei neihsanna pakhat world champion vawi nga ni tawh Mary Kom erawh a inlan phak dawn lo thung! Manipuri boxer hian 2012 London-ah khan flyweight (51 kg) category-ah bronze medal dawngin Indian boxer zinga hetiang dinhmun luah thei hmasa ber hi a ni nghe nghe - Rio-a a hmel kan hmu thei lo tur hi channa nasa tak a ni thei.

A dang chu...

Zika hrileng vangin khawvel golfer lang-sar 20 chuang zetin Rio an pan loh tur thu sawi mah se July 11, 2016-a IGF World Ranking chhuak thara Rank 62-na Anirban Lahiri, Shiv Chawrasia (Rank 207) leh Aditi Ashok (Rank 444) te chuan Brazil an pan dawn.

Kum 1964 hnulama India gymnast zinga Olympic hmachhawn leh thei tur hmasa ber chu Dipa Karmakar a ni. Gymnastics ang tho hian Judo-ah pawh India hian infiammi pakhat chauh a nei dawn - Avtar Singh chuan middleweight category (90 kg)-ah a khel ang.

Indian archer pali te chu Copenhagen, Denmark-a neih 2015 World Archery Championship-ah khan pariatna chunglama an lan avangin Olympic atan an tling. India thal kap thiamte hi mipa pakhat leh hmeichhe pathum an ni.

FINA aṭanga sawmna a hmuh angin Swimming Federation of India chuan Sajan Prakash (men 200m butterfly) leh Shivani Katariya (women 200m freestyle) te chu Brazil pan turin a thlang.

Table Tennis inelnaah mipa leh hmei-chhe single khel tur pahnih ve ve an tling. 2012 Olympian Soumyajit Ghosh (men) leh Manika Batra (women) te bakah Sharath Kamal Achanta leh 2004 Olympian Mouma Das te chu Hong Kong-a neih zawh tak Asian Qualification Tournament-ah an chet ṭhat avangin Rio-ah an kal ang.

India chuan Wrestling category hrang hranga inlan kim thei turin wrestler pariat a kal kim tir thei dawn. 2016 Asian Championship-a che ṭha pahnih Sathish Sivalingam leh Saikhom Mirabai Chanu te chu Weightlifting-ah an hmel kan hmu dawn bawk. Rowing bikah chuan FISA Asian and Oceania Olympic qualifying paltlang Indian rower Dattu Bhokanal hming a lang bawk a ni.