Borussia Dortmund winger thar Schurrle

Bundesliga club Borussia Dort-mund chu transfer bazar-ah an chet nat chhunzawm zel - Thomas Tuchel-a enkawl team hian Mario Gotze an lakluh thu an puan hnu lawkah Wolfsburg aṭangin Andre Schurrle an lalut ve leh ta.

Germany tan vawi 55 inlana goal 20 khung thei winger hian Signal Iduna Park-ah kum nga cham turin contract a ziak a, a man zat hi puan zar ni lo mah se pound maktaduai 25 bawr vel ni tura ngaih a ni.

Dortmund sporting director Michael Zorc chuan, " Schurrle hian international level-ah pawh tawnhriat tam tak a nei tawh a, a thiamna leh theihna hi kan team tan a ṭangkai dawn a ni," tiin Germany international an lakluh chhan a sawi.

Kum 25-a upa winger hian Thomas Tuchel-a enkawlna hnuaiah FSV Mainz 05 tan a lo khel tawh ṭhin a, season hnih chhung an inhrawn hman. Mainz aṭang hian Bayer Leverkusen a pan san a, season hnih tho hun a hmang.

Bayer Leverkusen tan match 83 a inlana goal 23 a khung hnuah kum 2013 khan Chelsea chu pound maktaduai 18-in a zawm a, London club tan season hnih chhungin match 65-a inlanah goal 14 a khung sak a, Premier League nomawi pakhat leh League Cup (1) a chawi hman.

Germany tan World Cup 2014 nomawi a chawi hnuah an ram lamah a kir leh a, pound maktaduai 22-in Wolfsburg a zawm. German club tan hian match 63 inlana goal 13 a khung sak hnuah a pu hlui Thomas Tuchel hrawn turin Borussia Dortmund lam a pan leh ta a ni.