Spain coach thar Julen Lopetegui

Royal Spanish Football Federation (RFEF) chuan Ningani khan Julen Lopetegui chu Spain coach thar atan an ruat, eng tianga rei nge an ram team hi a enkawl dawn tih erawh sawilan a ni lo.

Porto boss hlui hi Chinese sumdawng hausain pound maktaduai 45-a an lei thar Championship club Wolves zawm tur anga sawi a ni reng a, mah se tunah chuan Vicente del Bosque hmunruak a luah dawn tih a chiang ta.

Kum 65-a upa Del Bosque-a'n 2010 World Cup leh 2012 European Championship-ah te an ram hi hlawhtlinpui mah se 2014 World Cup-ah a hlawhchham pui a, a hna bansan tum mah se chelh a ni. 2016 Euro-ah Italy laka an mualpho leh tak avangin Real Madrid boss hlui hian a hna a kalsan.

Tunge Lopetegui?

Barcelona keeper hlui Lopetegui hian player a nih laiin sulhnu a nei ropui hran lo a, Real Madrid tan match khat a khelh bakah Catalan Club lian tan ṭum nga a inlan ve bawk. Spain tan pawh kum 1994 khan vawi khat goal a veng.

Asteasu, Spain-a piang Lopetegui hian kum 2003 khan Rayo Vallecano a enkawl ṭan a, Real Madrid B, Spain Under-19, Under-20 leh Under-21 te a enkawl hnuin nikum khan Porto a pan. Portuguese club hi match 53 hnehna chanpuiin vawi kua a chak loh pui a, an khingpuite nen ṭum 15 an inhnehtawk thung.

Zawi muangin...

Kum 49-a upa Lopetegui chuan, "Kan ram team dinhmun hi a chhe duai tihna a ni lo a, danglam thut kan mamawh hek lo. Zawi muanga hmasawn hret hret kan tum ang a, kan hmaa inkhel hmabaka hnehna chan dan tur chiah kan ngaihtuah lawk zel ang," tiin danglamna thlen nghal hluai a tum lem loh thu a sawi.

Del Bosque-a'n kum riat chhung zet team a lo din tawh chu a zah thu sawi lang telin, "Faootball khelh dan hi a inthlak danglam thut ngai lem lo, tun hma aṭanga kan lo chin ṭhan dan leh thiam bel sa kha a pawimawh. Kan ram sulhnu neihsa te kha a ropuiin a chhuanawm em em a, mah se tuna pawimawh ber erawh tun hun leh kan hma hun hi a ni," tiin a sawi bawk.

Lopetegui hna hmasa ber tur chu Belgium nen September 1 a friendly match an khelh tur a ni ang a, hemi hnu hian 2018 World Cup qualifying-ah Liechtenstein an mikhual zui leh bawk ang.

Manager kalchhuak ta Del Bosque chuan duhsakna thu sawiin,"Julen hian Spain enkawl turin theihna a nei, Under-21 team-ah kan lo thawk dun tawh a, a theihna leh thiamna ka hriatchian bakah kan inpawh hle bawk. Thil tih dawn reng renga inbuatsaihna ṭha tak neih duh mi leh mi rilru hneh thei tak a ni a, hmasawnna kawng a sial kuak ngei pawh ka ring," tiin a ringtawk hle.