Kawng harsa thlangtu Gotze

Borussia Dortmund coach Thomas Tuchel chuan Bayern Munich-a season thum hun a hman hnua an hnena kir leh thlangtu Mario Gotze chuan kawng awlsam ringawt thlir loa duhthlanna a siam thu a sawi.

Thomas Tuchel chuan, "Gotze hian kawng harsa zawk a thlang a ni. Club tam takin an duh a, awlsam takin nuamsa takin ram dangah a khel thei ang. Mahse, kan hnena lokir leh a thlang a ni. Gotze hi player pawimawh a ni a, hlim taka a nui hmel hmuh leh hi ka duh a ni," a ti.

Germany international hian kum 2013 khan Dortmund aṭangin Bayern Munich a pan a, an elpui ber club a pan avang hian Dortmund fan-ten an ngaidam thei lo - Gotze lakkir chung-chang sawi rik a nih tirh pawh khan Dortmund fan-te hian an duh loh thu an lo tlangaupui tawh a ni.

Dortmund defender Marcel Schmel-zer pawhin Gotze chu Signal Iduna Park-ah a tlangnel leh thuai a rin thu a sawi a, fan-te pawhin an player hlui chu midang ang thoa an lo dawnsawn a beisei thu a sawi.