Aizawl FC-in Ghanaian striker an lalut

23rd July, 2016

Mizoram Premier League champion Aizawl FC chuan Bright Middleton Mends an lalut a, Ghanaian striker hi I Day Football nomawi humhim tuma AFC inlan hunah a khel en theih a ni ang.

Mizo club zinga I League khel hmasa ber hian Yuta Kinowaki an chelh zui lo a, Japanese midfielder thlak turin Aizawl FC hian Nigerian midfielder Eniwo Benjamin Onone an be fel tawh. Super Eagles tan pawha inlan tawha sawi Benjamin hian Mizoram rawn pan turin visa fel chiah a ngai tawh a, I Day Football-ah a inlan hman beisei a ni bawk.

AFC an kim ta!

Aizawl FC hian season liam taa an player an chan nual a, Liberian striker Alfred Kemah Jaryan leh MPL4 best player F. Lalrinpuia te chu foreign striker lo tan an aiawh zawh theih a ni lo. Tuna Aizawl FC lakluh Bright Middleton Mends hi Ghana tan World Cup Under 17 Qualifier 2008 pawh lo khel tawh a ni a, Ghana Premier League-ah New Edubiase United first team tana goal kaw khung thei a ni bawk.

Kum 23-a upa Mends hi season liam ta khan senior team tana a khelh hnuah reserve team-ah an dah thla a, goal kua tho a khung leh. Striker palian ni lo mah se New Edubiase United tana a goal 18 zinga goal 6 hi a tauh luh a ni. Amaherawhchu zawhna awm thei erawh Mends hi India ramah a la khel ngai lo a, record en maia tualchhung football-a ṭha tura ngaih hian beisei a phak lo thei bawk.

Eng nge an sawi?

Aizawl FC technical director Hmingthansanga chuan, "Kan squad chhah nan foreigner kan la thei hi lawmawm khawp mai, kan player thar hian Mizorama an insiamrem thei a nih chuan team tan player thawhhlawk tak a ni ngei ang," tiin Vanglaini palai a hrilh.

Aizawl FC coach K. Mal-sawm-kima chuan, "Team practice vawi khat chauh ka la hmuh avangin ngaihdan ka la siam thei lo. Amaherawhchu player ṭha tak ni ngei chuan ka hria a, kan ṭangkai pui khawp ang," tiin player thar chungchang a sawi.

Team chungchang sawi zuiin Mala chuan, "Season liam taa player 16 vel zetin min chhuahsan a, mah se kan chhiat phah lo ang. Academy aṭangin player engemaw zat senior team-ah kan sawn chho a, hei hi a lawmawm hlein ka hria. Tuna kan squad hi kan ṭha tawk a ni," a ti.

Season liam ta khan Mala hian I Day Football-ah Aizawl FC a champion pui a, hemi zawh hian Spanish manager Manuel Retamero Fraile-a'n a rawn thlak zui. Tun season-ah erawh Mizo coach Mala hian AFC hi a enkawl leh dawn a, Thawhṭanni dar 12:30 hian I Day Football-a an match hmasa berah Chanmari FC an hmachhawn ang.

AIZAWL FC

# Hming Koh Dan Permanent Adress

GOALKEEPER

1 Zothanmawia T. Mawia College

2 Lalawmpuia Awmpuia Aizawl Venglai

DEFENDER

3 Jonathan Lalhriatkima Jona BVT

4 Lalruatthara Ruatthara Hmunhmeltha

5 Lalhriatrenga Achi-a Chanmari

6 Lalramhmunmawia Te-a Bilkhawthlir

7 Ricky Lallawmawma Ricky Durtlang-

9 Lalrinzuala Khiangte Rinzuala Venglai

10 Lalthakima Thakima Khawzawl VT

11 Lalramchullova Pautu Chullova Armed Veng

MIDFIELDER/WINGER

12 H.Lalbiakthanga B.T.A Kawnpui

13 Lalawmpuia Hnamte AWP-A Armed Veng

14 Brandon Vanlalremdika Brandon Hunthar

15 Rohmingthanga Rohminga Lengpui

16 Vanlalthazuala VL Thazuala Hlimen

17 Lalnuntluanga Tluanga Bawngkawn

FORWARD

18 Rochharzela Chhara Chhinga Veng

19 Jonathan Lalrawngbawla Jojo Electric Veng

20 Vanlalduatsanga Duata Armed Veng

21 F.Lalremsanga Remsanga Lengpui

22 William Lalnunfela William Tumpui, Kolasib

23 B.Zoramthara B.Thara Leitan

24 Albert Zohmingmawia Albert Kawnpui VT

Note : Foreign player tiam loa Aizawl FC Squad