England manager thar 'Big Sam' a chiang ta

"Bolton leh Blackburn vela inhamtang reng tur ka ni lo. Real Madrid emaw Inter Milan enkawl chi ka ni a, kumtinin nomawi ka chawi ang," titu Sam Allardyce chu England manager a ni ta - "England manager nih ka duh thu hi engtiklai mahin ka zep ngai lo a, ka tan chuan hei hi English football-a hna ṭha ber chu a ni," titu manager hi Football Association chuan an manager ni turin official-in an pawm a, England manager nghet 14-na a ni.

Kum 61-a upa manager hian England enkawl hna thawk tur hian kum hnih daih contract a ziak a, a kum khat hlawh tur hi tarlan ni lo mah se pound maktaduai 3 bawr vel ni tura ngaih a ni - English manager hian Euro 2016-a beisei an phak loh vanga bang ta Roy Hodgson a thlak a, September 4-a Slovakia nen World Cup qualifier an khelh hunah England manager a nih hnua a competitive match hmasa ber a hmachhawn ang.

Big Sam a phur

England manager hna chelh tura Sunderland kalsantu English boss chuan, "England-in hma kan sawn theihna turin ka theihna zawng zawng ka pe ang a, an phu ang hlawhtlinna pek ka tum ang. Chung zawng zawng aia nasa zawk chuan he ram leh a chhunga cheng mipuite inchhuan theihna tur thil tih ka tum dawn a ni," a ti.

Football Association chief executive Martin Glenn chuan, "Manager a lo nih tawhnaah tawnhriat ropui tak a nei a, chumi piahlamah chuan player leh team pumpui theihna leh thiamna hai chhuah a thiam dante, team rilru a chak duhna thinlung a tuh thiam dante ngaihtuahin Big Sam hi a lian ta ber a ni. England tana hmathlir thui tak a neihte hi hnawl mai atan chuan a uiawm lutuk deuh," tiin England manager atana inelna lianthama nomawi la chawi lo manager an ruat chhan a sawi.

Thlawptu ngah Sam

Manchester United manager Jose Mourinho chuan, "Sam hi England enkawl turin a inpeih a ni. Player-te fuihphur thiam tak, team boruak ṭha tak siam ṭhin mi a ni a, duhsakna ka hlan a ni. Manchester United-a English player-te hi a tan theihtawp chhuahin ka lo enkawl ang tih ka tiam a ni," tiin Sam a duhsak hle.

Portuguese manager chuan sawi chhunzawmin, "England fan-te leh FA hian semifinal emaw final luh an duh ṭhin tih ka hria a, nomawi chawi an duh a ni. Kum 1966 World Cup kha chu a rei tawh mah mah a ni," tiin England chuan Sam-a hnuaiah nomawi an chawi theih ngei a beisei.

English manager zinga Premier League match-a team kaihhruai hnem lama Sam (467) tluk loh awmchhun Harry Redknapp (641) chuan, "Euro en kha ka ning takzet a ni. Premier League khelh dan phung nen Sam a inlar ang a, a hmuhnawm dawn a ni," tiin Bolton, Newcastle, Blackburn leh West Ham boss hlui chu a ringtawk.

England manager hlui Sven-Goran Eriksson pawhin, "Sam hi English football-ah rei tak chhung a cham tawh a, result ṭha tak a nei ziah bawk. Mahni invawng tak a ni a, ka duhsakna sang ber ka hlan a ni," a ti.

England captain Wayne Rooney pawh a phur a, Manchester United striker chuan, "England team-ah inkhelh dan phung danglam zawk a rawn keng ang a, a hnuaiah hlawhtlinna duhawm zawk kan chhar theih ngei ka beisei a ni," tiin an manger thar a lo lawm.

Hmana an duh loh kha...

Kum 2006 World Cup zawh rualin a hunlaia England manager Eriksson a bang a, Swedish manager thlak tur an biak zingah Sam Allardyce a tel. Mahse, FA-in hetih hunlaia Bolton Wanderers manager ai hian Steve McClaren an duh zawk a, pa langtlang Big Sam-a'n England manager tura thlan a nih loh vanga a hnual thu a lo sawi tawh.

Tunah erawh engkim a danglam a, Roy Hodgson thlak tura hming an sawirik Steve Bruce, Bournemouth coach Eddie Howe leh USA manager Jurgen Klinsmann te zingah Football Associa-tion-in Big Sam a duh ber a, player a nih laia England tan a khelh phak loh vanga manager a nih hnuah tal an ram team enkawl a chak thu sawi ṭhintu manager duhthusam ram a thleng dik ta.

Big Sam-a style

Season hman zawh takah Big Sam-a'n Premier League aṭanga tla thei dinhmuna ding Sunderland a chhanchhuak a, a hming-
-ṭhat-pui zia chu a dawhkana England manager hna inchhawp hmangin finfiah a ni.

Big Sam hi 'long pass' hmang uara sawi a ni ṭhin a, season hman zawh taka a enkawlna hnuaia Black Cats-in an ball pass zinga 21% zet chu long pass niin Sunderland a enkawl hnua anni aia long pass ngah awmchhun chu 22.4 neitu West Brom chiah an ni.

October-a Sunderland a enkawl hnua Black Cats-in goal an khung zinga 42.5% chu set piece aṭanga lut a ni a, an chungah Crystal Palace (50%) leh West Brom (42.9) chiah an awm - an goal chhuah zinga 22.7% erawh set piece aṭanga an chhuah a ni thung.