Argentina manager tur inrinsiak

FIFA World ranking-ah pakhatna ni mah se Gerardo Martino a ban hnuah Argentina chu coach nghet nei loin an awm mek. Tualchhung thuthar thehdarhtute chuan coach thar atan Mauricio Pochettino hming an sawi ri ring hle.

Argentine Football Association (AFA) chief Armando Perez chu Atletico Madrid manager Diego Simeone leh Sevilla coach thar Jorge Sampaoli te be turin Spain-ah a kal dawn nia sawi a ni bawk.

Tottenham manager hian kum 2022 thleng cham turin White Hart Lane-ah contract a nei mek - Premier League manager langsar zinga mi ni mekin season hmasa khan Spurs hi pathumna a nih pui.

AFA chief Perez hian Copa America final zawha ram tana inkhelh chawlhsantu Lionel Messi pawh biak a tum thu a sawi a, Barcelona thiampuipa hi Argentina jersey ha leh tura a thutlukna sawh sawn tir theih a inbeisei niin a lang.