Arsenal tan Chamberlain a lo kir

Premier League inbuatsaih nan Arsenal chuan French football club RC Lens chu friendly match an khelhpui a, hun tawp dawna Alex Oxlade-Chamberlain goal khung hmangin 1-1 in an inhnehtawkpui.

Zirtawpni zan inkhelah midfielder Mathias Autret chuan minute 37-naah goal khungin mikhual Gunners a barakhaih. Arsene Wenger-a naute an chak lo mai dawna a lan hnuah hliam vanga hun rei tak inkhel thei lo tawh Chamberlain chuan minute 81-naah an si phurh a sut hram.

England international Chamberlain hi kumin February thlaa Barcelona nen Champions League last 16 an khelh ṭumin Javier Mascherano nen ball an inchuhna lamah hliam a tuar a, a hliam vang hian thla nga chhung zet inkhel thei loin Euro 2016-ah pawh a inlan theih loh phah hial.

Arsenal hian an squad tih chak tumin hma an la mek a, midfielder Granit Xhaka an lakluh hnuah defender Rob Holding chu Bolton Wanderers aṭangin pound maktaduai hnihin an lalut.

Kum 20-a upa Holding hi English rawlthar beisei awm ber pawl ni mekin season hmasa khan league match 30 a khel a, an club player of the season atan thlan a ni.

Arsenal tana inlante

Arsenal (4-2-3-1): Mar-tinez (Macey 46); Debuchy (Bielik 46), Mertesacker, Chambers, Monreal (Gibbs 46); Elneny (Campbell 46), Coquelin; Walcott (Zelalem 77), Iwobi (Willock 77), Reine-Adelaide (Oxlade-Chamberlain 46), Akpom (Gnabry 46).