London-ah Bolt a inlar leh ta

Khawvela tlan chak ber Usain Bolt chuan Rio Olympic hmain a dam chiang hman tih lantir turin Zirtawpni zan khan London Anniversary Games 200m intlansiakah hnehna a chang.

Olympic champion vawi ruk ni tawh Bolt hian 200m tlan thleng tur hian second 19.89 a hmang a, Panama sprinter Alonso Edward aiin second - 0.15 in a fal zawk. Commonwealth silver medallist Adam Gemili chu pathumna niin Britain tlangval hian second 20.07 hun a hmang thung.

Jamaican sprinter hi malpui na vangin a chawl reng a, a lo kir lehna hmasa berah hnehna a chan leh theih nghal avangin Rio Olympic-ah a title humhim thei tura beisei awm a ni leh tawh. Kumin chhunga 200m bika tlan ṭha ber chu United States sprinter LaShawn Merritt (19.74 sec) a ni - kum 2009-a Bolt-a'n record a lo siam tawh 19.19 erawh tluk thei an la awm lo.

Kum 29-a upa Bolt chuan, "Olympic sta-dium-a intlansiak hi chu engtiklai pawhin nuam ka ti. Ka ṭhat dan berin la tlan chhuak thei lo mah ila a pawimawh ber chu hliam nei loa ka inlan thei hi a ni, tunah chuan Olympic title humhim turin inrintawkna ka nei," a ti.