Sunderland manager thar David Moyes

Sam Allardyce chu England manager a nih tak avangin Sunderland tan a hmunruak hnawhkhat tur zawn a ṭul - a chhanna chu Premier League a tawn hriat ngah tawh David Moyes a ni.

Everton leh Manchester United manager hlui Moyes hian Stadium of Light-ah kum li cham turin contract a ziak a, Gus Poyet, Dick Advocaat leh Allardyce te hnungzuiin tun hnai kum thum pawh tling lo chhunga Sunderland manager palina tur a ni a, season hmasa Premier League-a 17-na Black Cats enkawl hi hna awlsam tak a ni lo ang.

Sulhnu

Kum 53-a upa Moyes hian 1998-2002 chhung khan Championship club Preston North End-ah manager hna a thawk ṭan. Hemi hnu hian Everton zawmin kum 11 chhung zet a enkawl a, Toffees-a hun a hman chhung hian LMA Manager of the Year atan ṭum thum thlan a ni nghe nghe.

Manchester United manager Sir Alex Ferguson-a'n kum 26 chhung hun a lo hman tawhna Old Trafford a chhuahsan dawn khan manager hming langsar dang aiin Moyes hi a hmunruak luahkhat turin a thlang.

Amaherawhchu, Moyes hian beisei angin United hi a kaihruai thei lo, thla 10 chauh hun a hmang hman tihin ban a ni a, La Liga club Real Sociedad a enkawl zui ta zawk. Spain-ah pawh beisei a phak chuang lo a, league-ah 16-na an nih laiin ban a ni leh - tunah hna thar a nei ve leh chauh a ni.

Duhthusam

Sunderland chairman Ellis Short chuan Moyes chu an club enkawl tura an duh ber leh tun hma lam aṭang a lo biak tawh ṭhin a nih thu a sawi a, "Football khelh dan kalhmang mumal tak nei a ni a, hei hian hun rei tak aṭang khan min hneh tawh," a ti.

Sawi chhunzawmin Short chuan, "Tun hma pawhin kan inbe fo tawh a, manager kan neih hnuhnung panga kan lakluh dawn khan ani hi kan lo be tawh ṭhin a, mahse a remchang lo. Tun ṭumah ani in kan hnen a rawn pan tur hi he club tan a lawmawmin a hlu em em a ni," tiin an manager thar tur chhungchang phur takin a sawi.

Club tharah beiseina a neih thu sawiin Moyes chuan, "British club lian tak pakhat enkawl leh theihna hun ka nei hi ka lawm. Sam-a hna lo thawh tawhte ṭha taka chhunzwm kan tum ang a, hmalam pan ngei turin kan thawkrim ang. Premier League-a chona thar hmachhawn leh thei tura ka lo kir thei hi ka lawm tak zet," a ti.

Inrinni zan khan New York Stadium-ah Sunderland hian Rotherham chu friendly match an khelhpui a, Fabio Borini leh Charles N'Zogbia te goal khung hmangin 2-1 in hnehna an chang - he inkhel hi Moyes chuan a hmunah a en ve nghal nghe nghe.

Sunderland hian season thar inbuatsaih nan France club FC Stade Nyonnais, Dijon FCO leh Montpellier te an hmachhawn leh dawn. August 13 khian Premier League-a an match hmasa ber atan Manchester City an hmachhawn dawn a, hei hi Moyers tan a competitive game hmasa ber tur a ni ang.