Liverpool-ah Arsenal keeper hlui

Merseyside club Liverpool chuan Arsenal tan pawha lo khel tawh ṭhin goalkeeper Alex Manninger an lalut a, a thlawna an lakluh keeper contract rei zawng hi 'hun rei lo te chhung atan' tih bakin tarlan a ni lo.

Manninger hi thla hmasa khan German club FC Augsburg chuan an chhuah zalen a, Liverpool-ah hian third choice keeper tura lut niin Loris Karius leh Simon Mignolet te thachhang dawltu a ni ang.

Kum 39-a upa keeper chuan, "Inkhel zel turin theihna sang tak ka la nei a, season tina match 50 khel tur erawh ka ni tawh lo. Mahse, goal veng tura koh ka nih phawt chuan ka inpeih reng ang," tiin kum tam tawh lamah first choice nih beiseia lut a nih loh thu a sawi.

Juventus tan pawha lo khel tawh keeper hian Austria tan vawi 33 lai goal a lo veng tawh a, Arsenal leh Juventus-a a khelh laiin league nomawi a lo chawi ve ve tawh bawk.