Celtic lakah Leicester an chungnung

Premier League champion Leicester City leh Celtic te chuan Inrinni zan khan friendly match an khel a, hun pang-ngaiah 1-1 a an inhnehtawk hnuin penalty shootout-ah Foxes hian 6-5 in hnehna an chang.

Lei-cester tan season hmasa Professional Footballers' Asso-ciation Player of the Year award dawngtu Riyad Mahrez-a'n a thiam a pholang nawn - minute 46-naah yard 25 a hla aṭangin mawi takin goal a khung.

Celtic goal hi defender Eoghan O'Connell khung a ni thung a, hun pangngai zawh hnuah goal dang a luh loh vangin penalty shootout hmanga chak zawk zawn a ni.

Penalty pet hmasa player 10 ten an khung vek hnuah Foxes keeper Kasper Schemichel chuan James Forrest pet dan sakin Daniel Amartey chuan an chakna goal a khung.

Foxes manager chuan Arsenal zawm tur anga an sawi mek Mahrez chungchang sawiin, "Khelmual chhungah a hlimzia kha in lo hmu em? a khel ṭha em em a, a taimak bakah team tan a ṭangkai a ni. Kan hnenah a awm chhunzawm ang," a ti.

Kum 2014 khan Leicester hian Le Havre aṭangin £400,000 chauhin Mahrez hi an lalut a, season duhawm tak a hman zawh hnuah Gunners nen sawi zawm a ni - North London club hian an lalut dawn a nih chuan pound maktaduai 50 vel lai an sen ngam a ṭul ang!