Vawiin aṭangin I Day Football Aizawl FC nge lian zawk Chanmari FC?

Vawiin chhun dar 12:00 hian Independence Day Football Tournament inkhel hmasa berah Lammualah Aizawl FC leh Chanmari FC an inkhel dawn - a hmuhnawm ang.

Season liam khan Chanmari FC chungah Aizawl FC an awm. AFC hi Independenc Day Football leh Mizoram Premier League champion an ni. Chanmari FC-in champion an duh leh tawh - player an inla ṭha hle.

Ghanaian striker?

Aizawl FC-in Ghanaian striker Bright Middleton Mends an lalut a, vawi khat chiah a la practice. AFC coach K. Malsawmkima chuan, "Inkhel bul ṭan turin a la inpeih loin ka hria, a luh leh luh loh erawh ka sawi thei lo," tiin Vanglaini palai a hrilh.

I Day Football cham-pion lai hian Nigerian midfielder Eniwo Benjamin an la dawn bawk a, Chanmari FC an hmachhawn hunah erawh Mizo hlangin an khelh a rinawm. I League-a player hmuhnawm Albert Zohmingmawia leh Brandon Vanlalremdika te an kawl a, veteran midfielder Rohmingthanga a awm bawk - an goal nawr a nâ ang.

Aizawl FC tlarhnung erawh fak hranpa an ngai tawh lo - Lalruatthara, Lalramchullova Pautu, Ricky Lallawmawma, Lalrinzuala Khiangte leh Lalhriatrenga te bakah goalkeeper ṭha Zothanmawia leh Lalawmpuia te awmna hi Mizo zingah chuan a ṭha dahkhawm an ni.

Sanga hoin

Lalsangzuala Hmar hnuaiah Bethlehem Vengthlang FC-in game mawi an khel a, Chanmari FC chilpûtin an coach hlui an lalut. Sanga rual hian midfielder ball sem thiam R. Malsawmtluanga chu an hmelma Aizawl FC aṭangin an la let bawk a, anni pahnih vang ringawt pawh hian vawiin inkhel hi a hmuhnawm ang.

Chanmari FC hian Sanga ruala BVT aṭanga an lakluh MS Dawngzela (Notea) leh Ramfangzauva te an inhliam a, mah se tlarhma lamah Malsawmfela te an kawl a, tlarhnung pui thiam midfielder Reuben Zosangpuia te an neih bawk avangin Aizawl FC laka hawi hniam tur an ni lo.

An inngam tawn

Aizawl FC coach Mala chuan, "Chan-mari hi team
ṭha tak an ni a, chutihrualin chak kan tum a, kan chak ngei pawh ka ring," a ti.

Chanmari FC coach Sanga chuan, "Kan hlauthawng lo. Aizawl FC hmachhawn tur hian kan inringtawk hle," a ti.

Group A-ah hian Aizawl FC, Chanmari FC, Chanmari West FC leh Chhinga Veng FC te bakah AIFF Academy an awm a, pahnih chiahin semifinal an luh dawn avangin match tin a pawimawh vek ang.

Inkhel en man Rs 30/- a ni. I league-a man to zawka kan en ṭhin team tho kha an ni dawn. School naupang uniform hate chu man loin an lut thei ang.