Pep a danglam bik- Delph

Manchester City mid­fielder Fabian Delph chuan kar thum chhung leka Pep Guardiola hnen aṭanga a zir chu hun kal tawha a lo zir belhkhawm ai pawha a tam zawk thu a sawi.

Kum 26-a upa Delph hian Premier League-ah match 129 a khel tawh a, coach tawnhriat nei ṭha Martin O'Neill, Paul Lam­bert leh Manuel Pellegrini te hnuaiah khel tawh mah se Spanish manager chu a danglam tih a zep lo.

July 2015-a Aston Villa aṭanga pound maktaduai riata City zawmtu Delph cuan, "Kar thum chhung training kan neih tawh hi a ṭha khawp mai, ka career chhung zawng aiin ka zir tam zawk. Ka uar lutuk inti mai thei a, mah se thudik a ni," tiin coach thar Pep Guardiola a fak thiam hle.

Bayern Munich leh Barcelona manager hlui chu fak chhunzawmin Delph chuan, "Thil harsa tak awlsam taka phochhuah thiam dan te, a khelh duh dan te, a thil hmuh thui tak te chu a danglam a. City khelh danah a rawn lang chho ang," tiin a sawi.

Pep Guardiola enkawl City hian friendly match hmasa berah Bayern Munich chu Allianz Arena-ah 1-0 in an hneh lo a, vawin tlai dar 5:00 hian mipui 91,000 lenna Bird's Nest Stadium-ah Manchester United an hmachhawn dawn.

Ruahsur nasat vangin nimin lam kha chuan Manchester khaw club pahnih hian an khelhna tur stadium-ah training an nei thei a, Olympic Sports Centre-ah inpuahchahna an nei thung.

Friendly match hi International Champions Cup tih a ni a, China-ah hian Manchester United, Manchester City leh Borussia Dortmund te chu an inkhel kual ang. Hemi zawh hian Gothenburg-ah City-in Arsenal nen August 7 hian friendly match an khel leh ang.