Reds player thar Wijnaldum

Liverpool chuan Newcastle United aṭangin midfielder Geor-ginio Wijnaldum chu pound maktaduai 25-in an lalut ta. Reds hian Netherlands international man atan hian pound maktaduai 23 an pe phawt ang a, pound maktaduai 2 dang erawh a chet ṭhat dan a zira pek leh tur a ni ang.

Anfield-a kum nga cham tura contract ziaktu midfielder hian season hmasa ṭan dawn khan PSV Eindhoven aṭangin Newcastle United chu pound maktaduai 14.5-in a zawm a, Premier League match 38-a inlanah goal 11 khung mah se Championship lama an tla tur erawh a venghim zo lo.

Liverpool manager Jurgen Klopp chuan, "Wijnaldum kan lalut thei hi ka hlim takzet a ni. Kan tan player ropui tak a nih theih ka beisei a, amahah hian kan la hmuh loh theihna a tam em em a ni. Inbiakna kan neih ṭantirh aṭangin hlawhtlinna chang tura kan thawhdun a ngai tih hi ka pawm nghal a ni," tiin a player thar chungchang a sawi.

Kum 25-a upa midfielder hian Feyenoord-ah a career a ṭan a, Netherlands tan vawi 30 inlanah goal ruk khung tawhin kum 2014-15 season-ah khan Dutch footballer of the year-ah thlan a lo ni tawh bawk.

Liverpool-in nipui transfer bazar-ah player thar paruk an nei tawh a, Wijnaldum hma hian Mainz goalkeeper Loris Karius, Schalke centre-back Joel Matip, Southampton forward Sadio Mane, FC Augsburg defender Ragnar Klavan, Red Star Belgrade midfielder Marko Grujic leh goalkeeper Alex Manninger te an lalut tawh.