Premier League Preview Stamford Bride-ah Chelsea Vs Manchester United

Manchester United-in an hmelma Manchester City an hneh aṭanga kar khatah Premier League champion tura beiseiawm lawr lak Chelsea hm­chhawn turin Stamford Bridge an tlawh dawn. Inkhelh ṭan hun hi zanin dar 10:00 a ni a, Star Sports 2-ah tihchhuah a ni ang.

Chelsea-in Premier League match 11-ah hneh loh an tawng tawh lo. An khelmual Stamford Bridge-a an hneh loh an tawn hnuhnun ber chu April 19, 2014 daih tawh kha a ni a, an khingpui chu Sunderland an ni.

London club hian Man­chester United nena inelna hrang hrang hnuhnung pasarihah chak loh an nei lo a, Premier League ṭan hnuah Manchester United nena an inkarah record an nei ṭha zawk. Chumai a ni lo, Jose Mourinho-a kaihruai Chelsea hi United hmaah an tlawm ngai lo. August 2004 khan Mourinho-a'n Premier League-a Manchester United a hmachhawn hmasak ber ṭumin London club hi 1-0 in an chak pui.

Louis van Gaal-a enkawl hnuah Chelsea leh Manchester United te hi Old Trafford-ah an inhnehtawk tawh a, United khelmuala club pahnih inkhelh hnuhnung 12-ah vawi khat chiah Chelsea an tlawm. Chutihrualin tunhnaia United record a ṭha hle, match hnuhnung parukah an chak a, goal 15 khungin goal li chiah an chhuah. An club hneh zingah Tottenham, Liverpool leh Manchester City an tel a, club lian zinga Dutch manager Van Gaal leh United khelh hmabak chu an chunga awm Chelsea leh Arsenal te an ni.

Club chanchin

Chelsea forward Loic Remy chu chawn hliam vanga harsatna a neih avangin inhliam vanga khel thei lo tur ve tho Diego Costa aiah tawnhriat nei ṭha Didier Drogba a luh rin a ni.

Manchester United harhtharna kawnga player pawimawh Michael Carrick chu Manchester Derby-ah inhliam vangin a bai chhuak a, Chelsea a hmachhawn thei dawn em tih a chiang lo. United tanaa thu lawmawm chu Robin van Persie leh Luke Shaw te'n training an zawm tawh a, defender Jonny Evans erawh chil chhak vangin hrem chhunzawm zel a ni.

Player pawimawh

Chelsea tan Diego Costa, Cesc Fabregas, Nemanja Matic leh John Terry te an pawimawh a, a langsar ber erawh Eden Hazard a ni. Belgian winger hian United captain Wayne Rooney goal khung zat goal 12 a khung tawh a, Diego Costa awm loh laiin field veilam hi Chelsea nawr na ber a ni.

Hazard hian assits vawi riat a nei tawh a, vawi 88 goal khungna chance a siam tawh bawk. Belgian winger hian Chelsea a zawm hnuah Manchester United lamah goal khat chauh a khung a, amaherawhchu United right back Antonio Valencia tan a hnawksak khawp ang.

Manchester United lamah Juan Mata hmuh hmaih a thiang lo. Premier League match hnuhnung pathumah Spanish midfielder hian goal thum a khung a, Liverpool leh Manchester City lama a goal khungte kha class tak vek a ni.

Chelsea player hlui Mata hi Stamford Bridge-ah mipui ṭan rawn a ni a, player of the season-ah pawh ṭum hnih lai thlan a ni. Chelsea chungchang sawiin Mata chuan, "Training-na leh ka inkhelh minute zawng zawngah ka theihtawp ka chhuah a, United an lo lan takah chuan ka career chhunzawmna tur niin ka hria. Ka hlimna tur club ka duh a, chu chu tuna ka awmna hi a ni," a ti.

Mata hi Jose Mourinho game plan-ah a tel lo a, January 2014 khan chhuah phalna an pek avangin United-in pound maktaduai 37.1 in an la lut. Kum khat hnuah Spanish midfielder hian a theihna a lanchhuah tir chauh a, Ander Herrera leh Marouane Fellaini te nen Manchester United midfield an ti chak hle.

Van Gaal vs Mourinho

Sir Bobby Robson-a'n Barcelona a enkawl lai khan Jose Mourinho hi coaching staff zing ami a ni. Louis Van Gaal-a'n Ajax hlawhtling taka a enkawl hnuah Robson-a thlak turin Barcelona a zawm a, Dutch manager hian a pu hlui chhan tlattu Mourinho chu coaching staff-ah a dah zui nghal.

United treble champion kum khan Van Gaal leh Mourinho te kaihhruai Barcelona chuan Sir Alex Ferguson-a hote chu Nou Camp leh Old Trafford-ah an draw ve ve a, manager pahnih hian an thu an duh avangin kawng tam takah in anna an nei nghe nghe.

Van Gaal chuan, "Mourinho hian football kalhmang hi a hrechiang a, inkhel a thlir thiam bakah a chhut thiam bawk," tiin Portuguese manager chu a fak hle. Club chhungah erawh an ngaina lo tih sawi langin Dutch manager chuan, "A chang kha chuan Jose kha keimah chauhin a chungah rinna ka nghat ni tein ka hre ṭhin," tiin a sawi hial.

Jose Mourinho pawhin a pu hlu hi a dah sang hle. Kum 2005-a Premier League a champion zawh khan Mourinho chuan, "Van Gaal hi pa fel tak a ni. Amah hi keimah ang thoa mahni inhrechiang em em a ni," a ti.

Manager ropui pahnih hi zanin hian Stamford Bridge-ah an inhmachhawn dawn a, club hrang ve ve an enkawl tawh avangin anmahni ropuina an ngai pawimawh tawh ang.