Parma point li an paihsak

Hmahruaitu Juventus an hneh aṭanga ni nga a ral hman awrh tihin Parma chu an hnathawkte hlawh pek theih loh vangin point li paih sak an ni.

Point paihsak hnuah Parma hian point 12 hmuin an chung chiaha awm Cagliari aiin point 17 in an hniam zawk a, match riat chiah khelh tur a awm tawh avangin season tharah Serie A an khelh a beiseiawm tawh lo.

Italian football federation (FIGC)-in club president hlui Giampietro Manenti leh director Pietro Leonardi te chu thla ruk chhung football-a inhnamhnawih thei lo turin an hrem tawh bawk.

Parma hian tun season-ah an player-te hlawh an la pe lo a, engemaw ti lai phei kha chuan player-te'n anmahni thawmhnaw an su hial. Parma hian Serie A dan an zawm theih loh avangin December thla khan point khat paih sak an ni tawh a, March thlaah point paih sak an ni leh a, tunah point li paih sak an ni leh tawh bawk.

FIGC-in a tarlan danin tuna point li an paih sak chhan hi an hun tiam February 16-a, July aṭanga December thla chhung thawktute hlawh an la pek theih loh vang a ni a, hei bakah hian income tax an pe thei lo a, khawtlang tana an thawh tur ang bituk an ti thei lo bawk.

Parma hian Serie A an la champion ngai lo a, UEFA Cup-ah erawh 1995 leh 1999 khan an champion a, 1993 European Cup Winners' Cup title an lak bakah Italian Cup title ṭum thum an la tawh bawk.